Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 64 Hüküm no: 18 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Todori ile Marat zimmîlerin eski şirket ortaklarına olan borçlarını ödemeleri Bir mikdârından sulh, bâkīsini edâya tenbîh Ma‘rûz Boyacı tâifesinden arzuhâl eden Sivasî Bogos v. Sagomon nâm zimmî İstanbul Bâb Mahkemesi’nde meclis-i şer‘de mukaddemâ şerîkleri derûn-ı arzuhâlde isimleri mastûr Todori v. Yako ve Marat v. Evanis nâm zimmîler muvâcehelerinde ben zimmiyân-ı mesfûrân ile fâide-i hâsıladan beynimizde beraber iktisâm olunmak üzere işbu sene-i mübâreke Cumâdelûlâsı gurresinde mahrûse-i Galata hısnı ebvâbından Kürkçükapısı dâhilinde kâin mersûmân Todori ve Marat zimmîlerin taht-ı icârelerinde olan bir bâb vakıf boyacı dükkânında şirket-i sanâyi‘ ile iki ay şerîkler olup ba‘dehu fesh-i akd-i şirket birle bu hafta hesâblarımızı bi’l-cümle boyacı esnâfı huzûrlarında yegān yegān sahîhan rü’yet eylediğimiz[de] her birimiz sermâyelerimizi ve fâide-i hâsıladan hisselerimizi ahz u kabz etmişidik lâkin ben işbu târîhden beş ay mukaddem mesfûrânın bi-şartı’r-rücû‘ emirleriyle dükkân-ı mezkûrun masârifât-ı ma‘lûmesine mâlımdan masrûfum olup bi’l-mürâca‘a hakkım olan beş yüz guruşu mersûmân Todori ve Marat zimmîlerden taleb ederim deyü tasaddî eylediğim da‘vâmdan bâ-tavassut-ı muslihîn mesfûrân Todori ve Marat zimmîler ile kat‘an-li’n-nizâ‘ elli guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâya ve husûs-ı şirkete ve işbu târîhe gelince sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr elli guruşun müdde‘î-i mersûm Bogos zimmîye edâ ve teslîmleriyle mesfûrân Todori ve Marat zimmîler ilzâm olundukları huzûr[-ı âlîlerine i‘lâm olundu] Fî 4 Receb sene [12]55