Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 65 Hüküm no: 19 Orijinal metin no: [3a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hanım’ın boşandığı kocasındaki alacağını erteleyip taksitlendirdiği Tatlîk ve te’cîl Ma‘rûz İstanbul’da Sultanselim kurbünde Debbâğyunus mahallesinde sâkine mu‘arrefetü’z-zât Ümmügülsüm bt. Mehmed İzzet nâm hatun İstanbul Bâb Mahkemesi’nde meclis-i şer‘-i münîrde zevc-i mutallıkı kutucu esnâfından Kadri Ağa b. İbrahim nâm kimesne muvâcehesinde mezbûr Kadri Ağa bin guruş mehr-i mu‘accel ve bin guruş mehr-i müeccel tesmiyeleriyle zevc-i dâhilim olup târîh-i i‘lâm günü beni tatlîk etmekle mezbûrun zimmetinde mehreyn-i mezkûreynim olan cem‘an iki bin guruşun bin üç yüz guruş mütâlebesine [3b] müte‘allika da‘vâdan zevcim mezbûrun zimmetini kabûlü hâvî ibrâ ve iskāt etmemle bâkīsi olan yedi yüz guruşu zevcim mezbûrun hâlen ve def‘aten bir vechile bana edâya iktidârı olmayıp ber-vech-i âtî te’cîle tâlib olduğundan ben dahi beher şehr kırkar guruş verip mecmû‘unu târîh-i i‘lâmdan on yedi ay on beş gün tamâmına değin tamâmen bana edâ ve îfâ etmek üzere rızâmla zevcim mezbûru te’cîl ve taksît eyledim deyü mukırra-ı merkūme Ümmügülsüm Hatunun bi’l-cümle takrîr-i meşrûhunu mezbûr Kadri Ağa’nın vicâhen tahkīk ve şifâhen tasdîk eylediği tescîl ve bi’l-iltimâs huzûr[-ı âlîlerine i‘lâm olundu] Fî 3 Receb sene [12]55