Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 67 Hüküm no: 24 Orijinal metin no: [3b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin para ve altınlarını aldığı iddiasıyla İbrahim Kadri Bey aleyhine açtığı davasını ispatlayamadığı Bilâ-beyyine mu‘ârazadan men‘ Ma‘rûz Medîne-i Şam ahâlîsinden eş-Şeyh Mehmed Efendi b. Yahya İstanbul Bâb Mahkemesi’nde meclis-i şer‘-i münîrde Enderûn-ı hümâyûndan muhrec İbrahim Ferid Bey b. İsmail b. İbrahim nâm kimesne tarafından husûs-ı âtîde vekîl olduğu Ahmed Şevki Efendi b. Mustafa ve el-Hâc Mehmed Ağa b. Abdullah nâm kimesneler şehâdetleriyle ber-nehc-i şer‘î sâbit olan es-Seyyid Mehmed Said Bey b. es-Seyyid Mehmed Ali muvâcehesinde ben bundan akdem mâlımdan bâ-defter-i müfredât eşyâ-i ma‘lûmem ile yüz elli aded yirmilik altınımı bir servi sandık derûnuna vaz‘ edip mukaffelen müvekkil-i mûmâ-ileyh İbrahim Ferid Bey yedine li-ecli’l-hıfz îdâ‘ ve teslîm eylediğimde ol dahi yedimden ahz u kabz eyledikden sonra zikr olunan sandığı gāib ani’l-meclis Yahya nâm kimesne yediyle bana irsâl ve teslîm ben dahi ahzedip ancak müvekkil-i mûmâ-ileyh İbrahim Ferid Bey zikri mürûr eden sandığın kuflünü küşâd ile derûnunda mevcûd üç bin guruşa mu‘âdil zikr olunan yüz elli aded yirmilik altınlarımı fuzûlî ve bi-gayri hakkın ahzetmekle mevcûde ise a‘yânını değil ise emsâlini müvekkil-i mûmâ-ileyhe izâfetle vekîl-i merkūm es-Seyyid Mehmed Said Bey’den tazmîn taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsına ikāmet-i beyyine edemeyip tahlîfe dahi tâlib olmamağın [4a] mûcebince müdde‘î-i mezbûr eş-Şeyh Mehmed Efendi da‘vâ-yı mezkûresiyle müvekkil-i mûmâ-ileyhe bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Sultanbayezidli Numan Kavas kulları yediyle huzûr[-ı âlîlerine i‘lâm olundu] Fî 8 Receb sene [12]55