Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 68 Hüküm no: 26 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeker İbrahim’in Kemerci Mehmed’e olan borcunu ödemesi 1500 guruşa hüküm Ma‘rûz Kemerci tâifesinden arzuhâl eden Mehmed b. Ahmed İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûr Şeker İbrahim b. Ahmed nâm kimesne muvâcehesinde mezbûrun zimmetinde [ve] yedinde olup işbu bin iki yüz elli beş senesi Saferi’l-hayrı’nın on altıncı [günü] târîhiyle müverrah bir kıt‘a temessüğü mantûkunca semen-i mebî‘den iki bin dört yüz guruşdan bâkī bin beş yüz guruş alacak hakkım olmağla meblağ-ı bâkī-i mezkûru mezbûr İbrahim’den hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olup meblağ-ı bâkī-i mezkûr bin beş yüz guruş zimmetinde müdde‘î-i mezbûra deyni olduğunu ikrâr ü i‘tirâf etmeğin alâ-mûcibi i‘tirâfihi meblağ-ı mezkûr bin beş yüz guruşun müdde‘î-i mezbûr Mehmed’e edâsıyla merkūm İbrahim ilzâm olunduğu huzûr[-ı âlîlerine i‘lâm olundu] Fî 8 Receb sene [12]55