Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 96 Hüküm no: 68 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bergama’nın Bölücek-i kebîr köyündeki Süleyman Ağa Camii imamet cihetinin Mehmed, Ahmed ve Mustafa’ya müşterek olarak tevcihi Ma‘rûz, Sâdır olan fermân-ı âlîlerine imtisâlen işbu arz ve derkenâra nazar olundukda Bergama kazâsına tâbi‘ Bölücek-i kebîr karyesinde vâki‘ ashâb-ı hayrâtdan Süleyman Ağa nâm sahibü’l-hayrın binâ eylediği câmi‘-i şerîfinde yevmî nîm akçe vazîfe ile imâmet cihetine mutasarrıf olan Hüseyin b. Eyüb fevt olup yeri hâlî ve hizmet-i lâzımesi mu‘attal kaldığından cihet-i mezkûr müteveffâ-yı mezbûrun sulbî kebîr oğulları bâ‘is-i arz Mehmed ve Ahmed ve Mustafa’ya tevcîhini kazâ-i mezbûr nâibi es-Seyyid Mehmed Necib Efendi dâ‘îleri mührü mutâbık arz ve inhâ etmeğin fi’l-hakīka cihet-i merkūme vazîfe-i mersûmesiyle bâ-berât-ı âlîşân el-yevm müteveffâ-yı mezbûr Hüseyin’in üzerinde olduğu derkenârdan müstebân ve merkūm Hüseyin’in fevti vâki‘ ve Mehmed ve Ahmed ve Mustafa sulbî kebîr oğulları olduklarını mazmûn-ı arzı tasdîk eden kazâ-i mezbûr ahâlîsinden Dersa‘âdet’de müsâfireten sâkinler Tatar İbrahim b. Salih ve Mehmed Şâkir b. İbrahim nâm kimesnelerin alâ-tarîkı’ş-şehâde ihbârlarıyla zâhir ve mütehakkık olmağın bu sûretde imâmet-i mezkûre ber-mûceb-i arz müteveffâ-yı mezbûr Hüseyin’in mahlûlünden sulbî kebîr oğulları merkūmûn Mehmed ve Ahmed ve Mustafa nâm karındaşlara bi’l-iştirâki’s-seviy tevcîh ve yedlerine berat-ı şerîf-i âlîşân sadaka ve ihsân buyurulmak re’y-i sâmîlerine menût idiği huzûr-ı âlîlerine i‘lâm olundu. Fî 16 M sene [12]49