Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 71 Hüküm no: 30 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosis’in Ahmed Ağa’ya olan borcunu ödemesi Mevkūfen alâ-yemîni’l-müvekkil Ma‘rûz Asâkir-i mansûre alaylarından Onuncu Alayın Üçüncü Taburu’nda gāib ani’l-beled Dördüncü Çavuş Ahmed Ağa b. Abdullah b. Abdullah tarafından husûs-ı âti’l-beyânda vekîl olduğu Halil Ağa b. Hüseyin ve Mehmed Ağa b. Hüseyin nâm kimesneler şehâdetleriyle ber-nehc-i şer‘î sâbit olan Ali Ağa b. Hüseyin nâm kimesne İstanbul Bâb Mahkemesi’nde meclis-i şer‘-i münîrde bakkāl tâifesinden Mosis v. Karabet nâm zimmî muvâcehesinde müvekkilim merkūm Ahmed Ağa’nın mersûm Mosis zimmî zimmetinde cihet-i karzdan yüz elli guruş alacak hakkı olmağla meblağ-ı mezkûru mesfûr Mosis zimmîden bi’l-vekâle hâlâ taleb ederim deyü da‘vâ ettikde ol dahi cevâbında müdde‘î-i vekîl-i mezbûr Ali Ağa’nın ber-vech-i muharrer müdde‘âsını ikrârında [ikrâr lâkin] deynim olan meblağ-ı mezkûru bundan akdem müvekkil-i merkūm Ahmed Ağa’ya tamâmen edâ ve teslîm etmişidim deyü müdde‘î-i vekîl-i merkūmun inkârlarına mukārin eylediği def‘ine ikāmet-i beyyine edememekle ikrâr ü i‘tirâfı mûcebince mevkūfen alâ-yemîni’l-müvekkil meblağ-ı mezkûr yüz elli guruşu müvekkil-i mezbûr Ahmed Ağa içün müdde‘î-i vekîl-i merkūm Ali Ağa’ya edâ ve teslîme mesfûr Mosis zimmîye tenbîh olunduğu bi’l-iltimâs huzûr[-ı âlîlerine i‘lâm olundu] Fî 10 Receb sene [12]55