Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 71 Hüküm no: 31 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Mardiros zimmîye olan borcunu ödemesi [1]900 guruşa hüküm Ma‘rûz Neccâr tâifesinden İstanbul perâkendesi neferâtından Mardiros v. Arakil nâm zimmî İstanbul Bâb Mahkemesi’nde meclis-i şer‘-i hatîrde İstanbul’da Aksaray kurbünde Gurebâ Hüseyinağa mahallesinde sâkine mu‘arrefetü’z-zât Mısırlı Âişe Hatun bt. Mehmed Emin muvâcehesinde mezbûre Âişe Hatun mahalle-i mezbûrede mutasarıfe olduğu bir bâb menzilini bundan akdem ta‘mîr ve termîm eylediği esnâda menzil-i mezkûrda neccârlık etmemle müddet-i ma‘lûmede benim ücretimden müctemi‘ olan üç yüz guruş ve bi-şartı’r-rücû‘ emriyle ma‘lûmü’l-esâmî zimmîlere mâlımdan medfû‘âtım olan bin altı yüz guruş ki cem‘an bin dokuz yüz guruşu mezbûre Âişe Hatun’dan bi’l-mürâca‘a hâlâ taleb ederim deyü ba‘de’d-da‘vâ ve’l-ikrâr mûcebince meblağ-ı mecmû‘-ı mezkûr bin dokuz yüz guruşun müdde‘î-i mersûm Mardiros zimmîye edâ ve teslîmiyle mezbûre Âişe Hatun ilzâm olunduğu mübâşirleri Bâb-ı Seraskerî kavaslarından Ahmed Kavas kulları yediyle huzûr[-ı âlîlerine i‘lâm olundu] Fî 13 Receb sene [12]55