Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 72 Hüküm no: 34 Orijinal metin no: [4b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mustafa’nın Yorgani Halil Ağa’ya olan borcunu ödemesi 430 guruş hüküm Ma‘rûz Yorganî el-Hâc Halil Ağa b. Hasan İstanbul Bâb Mahkemesi’nde meclis-i şer‘-i münîrde Merkepçi Derviş Mustafa b. Mustafa muvâcehesinde mezbûrun zimmetinde târîh-i i‘lâmdan altmış yedi gün mukaddem mâlımdan ve yedimden bi-safkatin vâhidetin iştirâ ve kabz eylediği ot memlû on iki Kıbrıs basması yastık ve üç Kıbrıs basması mak‘ad <> ve bir çubuklu şeytan bezi döşek yüzü ve bir baş yastığı ve bir müsta‘mel kılıf ve bir minder kılıfı semenlerinden dört yüz on guruş ve bi-şartı’r-rücû‘ emriyle gāibân ani’l-meclis Ömer ve Hasan nâm kimesneler ücretleri’çün mâlımdan medfû‘um olan yirmi guruş ki cem‘an dört yüz otuz guruş alacak hakkım olmağla meblağ-ı mecmû‘-ı mezkûru mezbûr Derviş Mustafa’dan hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını her biri mahallerinde lede’t-tezkiye adl ve makbûlü’ş-şehâde idikleri ihbâr olunan Yorganî Halil Ağa b. Mehmed Kâmil ve Mahmud Ağa b. Veliyyüddin nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mecmû‘-ı mezkûr dört yüz otuz guruşu müdde‘î-i mezbûr el-Hâc Halil Ağa’ya edâya mezbûr Derviş Mustafa’ya tenbîh olunduğu mübâşirleri Bâb-ı Seraskerî kavaslarından Zağferanborlulu (Safranbolulu) Mehmed Kavas kulları yediyle huzûr[-ı âlîlerine i‘lâm olundu] Fî 16 Receb sene [12]55