Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 73 Hüküm no: 35 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocasına itaat etmesi hususunda Şerife Hafize Hanım’a tenbihte bulunulduğu Zevcenin itâ‘atine tenbîh i‘lâmı Ma‘rûz Havâss-ı refî‘a kazâsına muzâfe Kâğıdhâne karyesinde sâkin es-Seyyid Mehmed b. Ahmed nâm kimesne İstanbul Bâb Mahkemesi’nde meclis-i şer‘-i münîrde hâlâ zevcesi mu‘arrefetü’z-zât Şerife Hafize bt. es-Seyyid Ali nâm hatun muvâcehesinde mezbûre Şerife Hafize Hatun sekiz yüz guruş mehr-i mu‘accel-i müstevfâ ve beş yüz bir guruş mehr-i müeccel tesmiyeleriyle zevce-i menkûha-i medhûlün-bihâm olup lâkin bana itâ‘at ve hukūk-ı zevciyyete mürâ‘at etmemekle suâl olunup karye-i mezbûrede vâki‘ tedârük ve müheyyâ eylediğim galak ve merâfıkı başka menzilime gelip bana itâ‘at ve hukūk-ı zevciyyete mür[â]‘at etmek üzere zevcem mezbûre Şerife Hafize Hatun’a tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihi ikrâr ü i‘tirâf etmeğin mûcebince zevci müdde‘î-i merkūmun tedârük ve müheyyâ eylediği galak ve merâfıkı başka menziline gidip itâ‘at ve hukūk-ı zevciyyete mür[â]‘at etmek üzere zevcesi mezbûre Şerife Hafize Hatun’a tenbîh olunduğu mübâşirleri Bâb-ı Seraskerî kavaslarından Bulgurlulu Mehmed Kavas kulları yediyle huzûr[-ı âlîlerine i‘lâm olundu] Fî 5 Receb sene [12]55