Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 74 Hüküm no: 36 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın ayrıldığı eşine kızları için ödediği nafaka miktarında indirime gidildiği Tenzîl-i nafaka Ma‘rûz İstanbul’da Ayasofya-i kebîr mahallesinde sâkine derûn-ı arzuhâlde mezkûretü’l-ism mu‘arrefetü’z-zât Şerife Hadice bt. Osman nâm hatun İstanbul Bâb Mahkemesi’nde meclis-i şer‘-i münîrde zevc-i sâbıkı sâhib-i arzuhâl Mehmed Ağa b. Osman nâm kimesne muvâcehesinde mezbûr Mehmed Ağa ile mukaddemâ zevciyyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hâlâ hacr ü terbiyemde olan sulbiye kızları dört yaşında Şerife Cemile ve on beş aylık Şerife Hadice nâm sagīretânın nafaka ve kisve-bahâlari’çün babaları mezbûr Mehmed Ağa üzerine kıbel-i şer‘den mukaddemâ bâ-hüccet takdîr olunan sagīretân-ı mezbûretândan her birine beher şehr kırkar guruşdan ikisine cem‘an seksen guruş kadr-ı ma‘rûfdan ziyâde olduğunu mezbûr Mehmed Ağa iddiâ etmekle ben dahi işbu târîhden i‘tibâren her birinden onar guruşdan ikisinden cem‘an yirmi guruşunu rızâmla hatt ü tenzîl edip bâkī altmış guruşunu ibkā eyledim dediğini mezbûr Mehmed Ağa’nın tasdîk eylediği huzûr[-ı âlîlerine i‘lâm olundu] Fî 8 Receb sene [12]55