Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 75 Hüküm no: 38 Orijinal metin no: [5a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirhor’un Papuççu Markos’a olan borcunu ödemesi Yemînden nükûl, mûcebiyle hüküm Ma‘rûz Papuşçu tâifesinden Markos v. Kokas nâm zimmî İstanbul Bâb Mahkemesi’nde meclis-i şer‘de sâ‘atçi esnâfından derûn-ı arzuhâlde mastûratü’l-ism Kirhor v. Zakar nâm zimmî muvâcehesinde ben târîh-i i‘lâmdan yedi sene mukaddem mâlım olan bir aded sâ‘atçi mengene gediğimi mersûm Kirhor zimmîye sekiz yüz guruş semen tesmiyesiyle bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semen-i mezkûr sekiz yüz guruşun altı yüz guruşunu mukaddemâ edâ ve teslîm ve ben dahi yedinden ahz u kabz etmemle bâkīsi olan iki yüz guruşu mersûm Kirhor zimmîden hâlâ taleb ederim deyü da‘vâ ettikde ol dahi cevâbında sâlifü’z-zikr sâ‘atçi mengene gediği âlât-ı lâzımesini târîh-i merkūmda altı yüz guruş semen tesmiyesiyle iştirâ ve kabz ve meblağ-ı mezkûru dahi müdde‘î-i mersûmun kabzını mu‘terif olduğu üzere edâ ve teslîm etmişidim deyü da‘vâ mersûmun iki yüz guruş müdde‘âsını inkâr etmekle müdde‘î-i mersûm ber-vech-i muharrer müdde‘âsına ikāmet-i beyyine edemeyip bi’t-taleb mersûm Kirhor zimmîye bi-vech-i şer‘î [ber-vech-i şer‘î] üzere üç def‘a yemîn teklîf olundukda ol dahi yemînden nükûl etmeğin mûcebince meblağ-ı bâkī-i mezkûr iki yüz guruşu müdde‘î-i mersûm Markos zimmîye edâya mersûm Kirhor zimmîye tenbîh olunduğu huzûr[-ı âlîlerine i‘lâm olundu] Fî 16 Receb sene [12]55