Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 75 Hüküm no: 39 Orijinal metin no: [5a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularını rahatsız eden Hayriye Hanım ile oğlunun bulundukları mahalleden çıkarılmaları Mahalleden ihrâc Ma‘rûz İstanbul’da Şeyh Ebulvefâ kurbünde Sekbânbaşı İbrahimağa mahallesi İmâmı es-Seyyid Ali Efendi b. Abdullah ve muhtâr-ı sânî es-Seyyid Ahmed Nazif Ağa b. Ahmed ve ahâlîsinden Halil Ağa b. Ali ve Ahmed Ağa b. Feyzullah ve Emin Ağa b. el-Hâc Ahmed ve Halil Ağa b. Ahmed ve Süleyman Ağa b. Mehmed Sadık ve Mustafa Ağa b. Süleyman nâm kimesne ve sâirleri İstanbul Bâb Mahkemesi’nde meclis-i şer‘-i münîrde mahalle-i mezbûre sâkinelerinden zâtı mu‘arrefe Hayriye bt. el-Hâc Mehmed nâm hatun ile sulbî kebîr oğlu Hüseyin b. Hasan muvâcehesinde mezbûrân mahallemiz ahâlîsinden olup lâkin kendi hâllerinde ırz ü edebleriyle mukayyed olmayıp bed-zebân ve hadîdü’l-lisân olduklarından mâ‘adâ dâimâ menzillerinde meçhûlü’l-ahvâl ricâl ve nisâ beytûtet ve hattâ târîh-i i‘lâma gecesi zâbit ma‘rifetiyle menzili basılıp alenen alâmât-ı fıskla mezbûr Hüseyin’i ma‘an Bâb-ı Seraskerî’ye irsâl etmemizle ol vechile mezbûrânın bu gûnâ harekât-ı nâ-marziyelerinden emn ü rahatımız meslûb olmuşdur deyü bi’l-muvâcehe sû-i hâllerinden bahisle iştikâ ve mahalle-i mezbûreden hurûclarını iltimâs eyledikleri mübâşirleri Bâb-ı Seraskerî kavaslarından Kayseriyeli Süleyman Kavas kulları yediyle huzûr[-ı âlîlerine i‘lâm olundu] Fî 20 Receb sene [12]55