Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 96 Hüküm no: 69 Orijinal metin no: [16b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akçaviran köyündeki Mustafa b. Abdullah’ın yaptırdığı caminin imamet ve hitabet cihetlerinin Mehmed b. Eyüb’e tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Anadolu’da Buhurun? kazâsında Akçaviran karyesinde vâki‘ Mustafa b. Abdullah’ın binâ ve ihyâ eylediği câmi‘-i şerîfde ber-vech-i hasbî imâmet ve hitâbet cihetlerine mutasarrıf olan Mehmed b. Hüseyin bilâ-veled fevt olup yeri hâlî ve hizmet-i lâzımesi mu‘attal kaldığından bahisle imâmet ve hitâbet-i mezkûre kendüye tevcîh buyurulmak bâbında sahib-i arzuhâl Mehmed b. Eyüb dâ‘îleri istid‘â-yı inâyet eder fi’l-hakīka ciheteyn-i mezkûreteyn merkūm Mehmed b. Hüseyin’in bâ-berât-ı âlîşân üzerinde olduğu derkenârdan müstebân olmağın merkūm Mehmed’in bilâ-veled fevt olduğunu ve sahib-i arzuhâl Mehmed b. Eyüb’ün erbâb-ı istihkākdan idiğini kazâ-i mezbûr ahâlîsinden Der-aliyye’de müsâfireten sâkinler talebe-i ulûmdan Ali Efendi b. Mustafa ve Ali b. Eyüb nâm kimesnelerin alâ-tarîkı’ş-şehâde ihbâr etmeleriyle zâhir ve mütehakkık olmağın bu sûretde ciheteyn-i mezkûreteyn müteveffâ-yı mezbûrun bilâ-veled mahlûlünden merkūm es-Seyyid Mehmed b. Eyüb’e tevcîh ve yedine müceddeden berat-ı şerîf-i âlîşân i‘tâ buyurulmak iktizâ eylediği huzûr-ı âlîlerine i‘lâm olundu. Fî 16 M sene [12]49