Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 80 Hüküm no: 48 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın borcunu ödemesi 3280 guruş hüküm Ma‘rûz Sâhib-i arzuhâl yumurtacı esnâfından İbrahim Edhem Ağa b. el-Hâc Halil İstanbul Bâb Mahkemesi’nde meclis-i şer‘-i münîrde mukaddemâ yazıcısı derûn-ı arzuhâlde mezkûrü’l-ism Süleyman Ağa b. Memiş nâm kimesne muvâcehesinde mezbûr Süleyman Ağa ile bundan akdem beynimizde cereyân eden ahz ü i‘tâmızın hesâbını işbu sene-i mübâreke şehr-i Rebî‘ulâhiri gurresinde yegān yegān sahîhan rü’yet eylediğimizde benim mersûmun zimmetinde beş bin beş yüz yetmiş altı guruş hakkım zuhûr ve meblağ-ı mezkûrun bin beş yüz yetmiş altı guruşunu mütâlebesine müte‘allika da‘vâdan mezbûr Süleyman Ağa’nın zimmetini kabûlü hâvî ibrâ ve iskāt edip bâkīsi olan dört bin guruş zimmetinde bana deyni olduğunu mezbûr Süleyman Ağa kat‘iyyen ikrâr ve târîh-i mezkûr ile müverrah mümzâ ve mahtûm işbu bir kıt‘a temessüğü dahi yedime i‘tâ eylediğinden sonra meblağ-ı bâkī-i mezkûrun yedi yüz kırk guruşunu zahr-ı temessük mantûkunca kabz ve istîfâ etmemle mâ‘adâsı olan üç bin iki yüz seksen guruşu mezbûr Süleyman Ağa’dan hâlâ taleb ederim deyü da‘vâ ettikde mezbûr Süleyman Ağa dahi cevâbında kaziyye minvâl-i meşrûh üzere olduğunu bi-tamâmihâ ikrâr ü i‘tirâf etmeğin alâ-mûcibi i‘tirâfihi meblağ-ı bâkī-i mezkûr üç bin iki yüz seksen guruşun müdde‘î-i merkūm İbrahim Ağa’ya edâ ve teslîmiyle mezbûr Süleyman Ağa ilzâm olunduğu huzûr[-ı âlîlerine i‘lâm olundu] Fî 12 Receb sene [12]55