Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 97 Hüküm no: 70 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aksaray kazasındaki Tavşancılar Vakfı’nın mîrâblık cihetinin Abdullah ve Ali kardeşlere tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Aksaray kazâsında Tavşancılar Vakfı’nın nısf hisse mîrâblık cihetine mutasarrıf olanlar Abbas ve Ali ibney Abdullah nâm karındaşlardan merkūm Abbas bilâ-veled fevt olup yerleri hâlî ve hizmet-i lâzımesi mu‘attal kaldığından bahisle cihet-i mezkûre kendülerine tevcîh buyurulmak bâbında sahib-i arzuhâl karındaşları Abdullah ve Ali dâ‘îleri istid‘â-yı inâyet ederler fi’l-hakīka nısf hisse-i mezkûre vazîfe-i mersûm ile Abbas ve Ali nâm karındaşların bi’l-iştirâk ve yine hisse-i âharı dahi karındaşları Mehmed ve İbrahim ve Abdullah nâm kimesnelerin bi’l-iştirâk üzerlerinde olduğu derkenârdan müstebân ve merkūm Abbas’ın fevti vâki‘ ve sahib-i arzuhâl müteveffâ-yı mezbûrun karındaşı ve müşterekleri olduklarını kazâ-i mezbûr ahâlîsinden Der-aliyye’de müsâfireten sâkinler Abdullah b. Ali ve Mustafa b. Hasan nâm mevsûku’l-kelim kimesnelerin alâ-tarîkı’ş-şehâde ihbârlarıyla istihkākları zâhir ve nümâyân olmağın bu sûretde rub‘ hisse mîrâblık müteveffâ-yı merkūm Abbas’ın bilâ-veled mahlûlünden karındaşları ve müşterekleri Abdullah ve Ali’ye bi’l-iştirâk tevcîh ve yedlerine berat-ı şerîf-i âlîşân ihsân buyurulmak re’y-i sâmîlerine menût idiği huzûr-ı âlîlerine i‘lâm olundu. Fî 16 M sene [12]49