Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 84 Hüküm no: 56 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Salih’in hanımının mehrini ödemesi Mehr-i mu‘accel hüküm Ma‘rûz İstanbul’da Kadıçeşmesi kurbünde Sinanağa mahallesinde sâkine mu‘arrefetü’z-zât Âişe bt. el-hâzır el-Hâc İsmail nâm hatun İstanbul Bâb Mahkemesi’nde meclis-i şer‘de hâlâ zevci Mehmed b. Salih nâm kimesne muvâcehesinde ben bundan akdem nefsimi mezbûr Mehmed’e sekiz yüz elli guruş [mehr-i] mu‘accel ve sekiz yüz guruş mehr-i müeccel tesmiyeleriyle tezvîc ve tenkîh eylediğimde ol dahi tezevvüc ve duhûl edip lâkin mehr-i mu‘accel-i mezkûrumu henüz edâ ve îfâ etmemekle suâl olunup mehr-i mu‘accel-i mezkûr sekiz yüz elli guruşu bana edâya zevcim mezbûra tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i meşrûh üzere olduğunu bi tamâmiha tâyi‘an ve kat‘iyyen ikrâr ü i‘tirâf etmeğin mûcebince mehr-i mu‘accel-i mezkûr sekiz yüz elli guruşu zevcesi müdde‘iyye-i mezbûre Âişe Hatun’a edâ ve teslîme mezbûr Mehmed’e tenbîh olunduğu mübâşirleri bâb-ı âlî kavaslarından Ebubekir Kavas kulları yediyle huzûr[-ı âlîlerine i‘lâm olundu] Fî 20 Receb sene [12]55