Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 87 Hüküm no: 62 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın borcunu ödemesi 600 guruş ilzâm Ma‘rûz Sâhib-i arzuhâl Kasab es-Seyyid Ahmed Ağa b. Ali nâm kimesne İstanbul Bâb Mahkemesi’nde meclis-i şer‘de derûn-ı arzuhâlde ismi mezkûr es-Seyyid Mustafa Ağa b. es-Seyyid İbrahim muvâcehesinde mezbûrun zimmetinde bundan akdem mâlımdan ve yedimden iştirâ ve kabz eylediği lahm-ı ganem semeninden ba‘de külli’l-hesâb gayr-ı ez-teslîmât sahhu’l-bâkī altı yüz elli guruş ve yine mâlımdan ve yedimden iktirâz ve kabz ve umûruna sarfla istihlâk eylediği beş yüz guruş ki cem‘an bin yüz elli guruş alacak hakkım olmağla meblağ-ı mecmû‘-ı mezkûru merkūm es-Seyyid Mustafa Ağa’dan hâlâ taleb ederim deyü tasaddî eylediğim da‘vâmdan <> bâ-vesâtet-i muslihîn mezbûr es-Seyyid Mustafa Ağa ile bi’t-terâzî altı yüz guruş üzerine ba‘de-akdi musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr altı yüz guruşun müdde‘î-i merkūm es-Seyyid Ahmed Ağa’ya edâsıyla merkūm Mustafa ilzâm olunduğu huzûr[-ı âlîlerine i‘lâm olundu] Fî 25 Receb sene [12]55