Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 88 Hüküm no: 64 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Salih Hüseyin’in hanımının mehr-i muaccelini ödemesi 400 guruş mehr-i mu‘accel hükmü Ma‘rûz İstanbul’da Çarşambapazarı kurbünde Beyceğiz mahallesinde sâkine sâhibe-i arzuhâl mu‘arrefetü’z-zât Şerife Hadice bt. Hüseyin nâm hatun İstanbul Bâb Mahkemesi’nde meclis-i şer‘de hâlâ zevci derûn-ı arzuhâlde ismi mezkûr Derviş Salih b. Hüseyin nâm kimesne muvâcehesinde ben bundan akdem nefsimi mezbûr Derviş Salih’e dört yüz elli guruş mehr-i mu‘accel ve dört yüz elli bir guruş mehr-i müeccel tesmiyeleriyle tezvîc ve tenkîh eylediğimde ol dahi tezevvüc ve duhûl edip lâkin mehr-i mu‘accel-i mezkûrumu henüz bana edâ ve îfâ etmemekle suâl olunup mehr-i mu‘accel-i merkūm dört yüz elli guruşu bana edâya zevcim merkūm Salih’e tenbîh olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu bi tamâmihi <> tâyi‘an ve kat‘iyyen ikrâr ü i‘tirâf etmeğin alâ-mûcibi i‘tirâfihi mehr-i mu‘accel-i merkūm dört yüz elli guruşu zevcesi müdde‘iyye-i mezbûre Şerife Hadice Hatun’a edâ ve teslîme mezbûr Derviş Salih’e tenbîh olunduğu huzûr[-ı âlîlerine i‘lâm olundu] Fî 27 Receb sene [12]55