Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 93 Hüküm no: 76 Orijinal metin no: [8b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Bretmos’un Saltana Nasrâniyedeki alacağından vazgeçtiği 200 guruşa hüküm Ma‘rûz Bakkāl tâifesinden Bretamos v. Panayot nâm zimmî İstanbul Bâb Mahkemesi’nde meclis-i şer‘-i münîrde şahsı mu‘arrefe Saltana bt. Direko nâm Nasrâniye muvâcehesinde mersûme Saltana Nasrâniye zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği dört yüz guruş alacak hakkım olmağla meblağ-ı mezkûru mersûme Saltana Nasrâniyeden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mesfûre Saltana Nasrâniye ile bi’t-tav‘ ve’r-rızâ iki yüz guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz guruşun müdde‘î-i mersûm Bretamos zimmîye edâsıyla mersûme Saltana Nasrâniye ilzâm olunduğu mübâşirleri Bâb-ı Seraskerî kavaslarından Trabzonî Osman Kavas kulları yediyle huzûr[-ı âlîlerine i‘lâm olundu] Fî 28 Receb sene [12]55