Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 94 Hüküm no: 77 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo’nun borcunu ödemesi 234 guruş hüküm Ma‘rûz Mekârî tâifesinden Mehmed Ali b. Ali nâm kimesne İstanbul Bâb Mahkemesi’nde meclis-i şer‘de Dimo v. Yabandiri zimmî muvâcehesinde mersûm Dimo zimmî zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği yetmiş dört guruş ve Rumeli’de Manastır sancağında Köprü karyesinden Âsitâne-i aliyye’ye gelmek içün mâlımdan bir re’s bârgirimi yüz altmış guruşa mersûm Dimo zimmîye îcâr ve teslîm eylediğimde ol dahi ber-vech-i muharrer istîcâr ve kabûl edip ol vechile îcâr-ı mezkûreden alacağım olan yüz altmış guruş ki cem‘an iki yüz <> otuz dört guruşu mersûm Dimo zimmîden hâlâ taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını lede’t-tezkiye makbûlü’ş-şehâde idikleri ihbâr olunan Salim b. el-Hâc Abbas nâm kimesne ile Naum v. Maçiko zimmî şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mecmû‘-ı mezkûr iki yüz otuz dört guruşu müdde‘î-i merkūm Mehmed Ali’ye edâya mersûm Dimo zimmîye tenbîh olunduğu mübâşirleri Bâb-ı Seraskerî kavaslarından Kasımpaşalı Yusuf Kavas kulları yediyle huzûr[-ı âlîlerine i‘lâm olundu] Fî 27 Receb sene [12]55