Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 98 Hüküm no: 72 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niksar’daki Çilehane Camii hitabetinin nısf hissesinin Seyyid Hafız Abdullah’a tevcihi Ma‘rûz, Sâdır olan fermân-ı âlîlerine imtisâlen işbu arz ve derkenâra nazar olundukda Anadolu’da Niksar kazâsında vâki‘ Çilehane Câmi‘-i şerîfinde ber-vech-i hasbî hitâbet cihetine mutasarrıf olan es-Seyyid Hâfız Abdülvahhab b. Ahmed fevt olup cihet-i mezkûre sulbî oğulları derûn-ı arzda isimleri mastûr es-Seyyid Hâfız Hüseyin ve es-Seyyid Hâfız Abdullah’a ber-vech-i iştirâk tevcîhi iktizâ eder iken merkūm es-Seyyid Hâfız Hüseyin karındaşı mezbûr es-Seyyid Hâfız Abdullah’ı ketm ve ihfâ ederken bir takrîb kazâ-i mezbûr nâibi esbak es-Seyyid el-Hâc Ahmed Efendi’den aldığı bir kıt‘a arz mûcebince müstakillen kendüye tevcîh ve üzerine berat ettirmiş ise de bu def‘a kazâ-i mezbûr nâibi es-Seyyid eş-Şeyh Mehmed Efendi dâ‘îlerinin işbu mührü mutâbık arzında cihet-i mezkûrenin nısf hissesi merkūm es-Seyyid Hâfız Hüseyin’in ref‘inden pederi müteveffâ-yı mezbûr es-Seyyid Hâfız Abdülvahhab mahlûlünden merkūm es-Seyyid Hâfız Abdullah’a tevcîh olunmasını inhâ etmeğin fi’l-hakīka cihet-i mezkûre müteveffâ-yı merkūm es-Seyyid Hâfız Abdülvahhab’ın mahlûlünden sulbî kebîr oğlu es-Seyyid Hâfız Hasan’a tevcîh olunup üzerinde olduğu derkenârdan müstebân ve mezbûr es-Seyyid Hâfız Abdullah merkūm es-Seyyid Hâfız Hüseyin’in karındaşı ve müteveffâ-yı merkūmun sulbî oğlu olduğu kazâ-i mezbûr ahâlîsinden bu esnâda Der-aliyye’de müsâfireten sâkinler Yüzbaşıoğlu Mustafa b. Mehmed ve Abdullah b. Ali nâm kimesneler dahi haber vermeleriyle cihet-i mezkûrenin [nısf] hissesi es-Seyyid Hâfız Hüseyin’in ref‘inden pederi müteveffâ-yı mezbûr mahlûlünden merkūm es-Seyyid Hâfız Abdullah üzerine tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu. Fî 4 S sene [12]49