.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 99
Hüküm no: 73
Orijinal metin no: [17b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Tosya’nın Gökçeözü ve Subh köylerindeki vakıf çiftliklerden bir kısım hissenin Ayşe Hatun’a tevcihi

Ma‘rûz,

Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Tosya kazâsında Gökçeözü nâm karyede nîm çiftlik ve Subh nâm karyede nîm çiftlik yeri Cafer Bey v. Hızır Bey nâm sahibü’l-hayrın vakfiyesi mukayyed olmamağla şurûtu nâ-ma‘lûm ise de amel-i kadîmi Mehmed Danişmend nâm kimesnenin evlâd-ı evlâdlarına meşrût olmak üzere zabtolunageldiğinden Mehmed Danişmend’in evlâdlarından Zeki ve Hüseyin ve Rahime ve Zenciye evlâdiyet ve meşrûtiyet üzere bi’l-iştirâk mutasarrıflar iken merkūm Hüseyin bilâ-veled fevt olup yeri hâlî kaldığından bahisle hisse-i mezkûre müteveffâ-yı mezbûrun mahlûlünden kendüye tevcîh ve yedine berat-ı âlîşân i‘tâsı sahib-i arzuhâl müteveffâ-yı mezbûrun kız karındaşı Âişe Hatun istid‘â-yı inâyet eder fi’l-hakīka hisse-i mezbûre Hüseyin ve Zeliha ve Rahime ve Zenciye’nin üzerlerinde olduğu derkenârdan müstebân ve merkūm Hüseyin’in bilâ-veled fevti vâki‘ ve sahibe-i arzuhâl Âişe müteveffâ-yı merkūmun li-ebeveyn kız karındaşı idiğini kazâ-i mezbûr ahâlîsinden Dersa‘âdet’de müsâfireten sâkinler Ahmed b. Mehmed ve Halil b. İbrahim mevsûku’l-kelim kimesnelerin alâ-tarîkı’ş-şehâde haber vermeleriyle mütehakkık olmağın bu sûretde hisse-i mezkûr merkūm Hüseyin’in bilâ-veled mahlûlünden kız karındaşı Âişe Hatun’a ber-mûceb-i şurût-ı vâkıf tevcîh ve yedine berat-ı âlîşân ihsân buyurulmak emr-i savâb idiği huzûr-ı âlîlerine i‘lâm olundu.

Fî 6 S sene [12]49