Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 96 Hüküm no: 80 Orijinal metin no: [9a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman’ın kefaletten dolayı alacaklı olduğu yolundaki iddiasını ispatlayamadığı Benden al demesi meşrû‘a olmayıp bî-vech-i şer‘î mu‘ârazadan men‘ Ma‘rûz Sâhib-i arzuhâl Osman b. Ahmed nâm kimesne İstanbul Bâb Mahkemesi’nde meclis-i şer‘de Ağabat v. Asvader nâm zimmî muvâcehesinde benim mersûm Ağabat zimmînin karındaşı gāib ani’l-beled Sirab zimmî zimmetinde cihet-i karzdan dört yüz guruş alacak hakkım olmağla meblağ-ı mezkûrun iki yüz guruşunu mukaddemâ mersûm Ağabat yediyle kabz ü istîfâ etmemle bâkīsi olan yüz eli guruşu gāib-i mersûmdan mütâlebe eylediğimde mersûm Ağabat zimmî benden al deyü ol vechile meblağ-ı mezbûra kefîl olmuş olmağla öyle olacak meblağ-ı bâkī-i mezkûr yüz elli guruşu mersûm Ağabat zimmîden taleb ederim deyü takrîr-i meşrûhu üzere benden al demesi elfâz-ı kefâletden olmamağla müdde‘î-i merkūmun tasaddî eylediği kefâlet da‘vâsı meşrû‘a ve iltifâta şâyân olmadığı müdde‘î-i merkūma tefhîm ve da‘vâ-yı mezkûresiyle merkūm Ağabat zimmîye bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 23 Receb sene [12]55