Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 100 Hüküm no: 87 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro’nun borcunu ödemesi 100 guruş men‘ beş guruş hüküm Ma‘rûz Bahçıvan tâifesinden Lazari v. Yuvan nâm zimmî İstanbul Bâb Mahkemesi’nde meclis-i şer‘-i hatîrde Petro v. Yuvan nâm zimmî muvâcehesinde mersûm Petro zimmî zimmetinde târîh-i i‘lâmdan sekiz gün mukaddem mâlımdan ve yedimden iştirâ ve kabz eylediği bir re’s doru bârgir semeninden üç yüz guruş alacak hakkımın yüz elli guruşunu gāib ani’l-meclis Aci Karagöz zimmîden havâle ve kırk beş guruşunu dahi mersûmun yedinden kabz ve ol vechile cem‘an yüz doksan beş guruşunu istîfâ etmemle bâkīsi olan yüz beş guruşu mersûm Petro zimmîden hâlâ taleb ederim deyü da‘vâ ettikde ol dahi cevâbında sâlifü’z-zikr bârgir ancak iki yüz guruşa iştirâ ve kabz ve semeni olan meblağ-ı mezkûrun yüz doksan beş guruşunu müdde‘î-i mersûmun kabzını mu‘terif olduğu üzere edâ etmemle bâkīsi zimmetimde beş guruş deynim kalmışdır deyü müdde‘î-i mersûmun ziyâde müdde‘âsını inkâr etmekle müdde‘î-i mersûm ber-vech-i muharrer ziyâde müdde‘âsına ikāmet-i beyyine edemeyip tahlîfe dahi tâlib olmamağın mûcebiyle müdde‘î-i mersûm ziyâde yüz guruş müdde‘âsıyla mersûm Petro zimmîye bilâ-beyyine mu‘ârazadan ba‘de’l-men‘ mersûm Petro zimmînin ikrâr ve i‘tirâfı mûcebince <> lâzım gelen meblağ-ı bâkī-i mezkûr beş guruşun müdde‘î-i mersûm Lazari zimmîye edâsıyla mersûm Petro zimmî ilzâm olunduğu huzûr[-ı âlîlerine i‘lâm olundu] Fî 27 Receb sene [12]55