Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 101 Hüküm no: 88 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin Tüccar Yani aleyhine açtığı hırsızlık davasını ispatlayamadığı 90 guruş bilâ-beyyine mu‘ârazadan men‘ Ma‘rûz İstanbul’da Topkapı kurbünde Cevîzzâde mahallesi ahâlîsinden es-Seyyid Hafız Ali Efendi b. Mehmed nâm kimesne İstanbul Bâb Mahkemesi’nde meclis-i şer‘-i münîr[de] tüccâr tâifesinden Yani v. Esteryo nâm zimmî muvâcehesinde tâife-i merkūmeden [To]dori v. Panayot nâm zimmî hâzır olduğu hâlde târîh-i i‘lâmdan on iki gün mukaddem mersûm Yani zimmî ile hâzır-ı mesfûr Todori zimmî mahalle-i mezbûrede vâki‘ menzi<>limde tüccârlık eyledikleri esnâda mersûm Yani zimmî menzil-i mezkûrun odasına vaz‘ eylediğim mecmû‘u doksan guruş kıymetli mismârımı hufyeten ahzetmekle mevcûde ise a‘yânını müstehleke ise ba‘de’s-sübût kıymet-i şer‘iyeleri olan doksan guruşu mersûm Yani zimmîden tazmîn taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsına ikāmet-i beyyine edemeyip bi’t-taleb mersûm Yani zimmî bi’l-muvâcehe vech-i şer‘î üzere tahlîf olunmağın mûcebince müdde‘î-i mezbûr es-Seyyid Hafız Ali Efendi da‘vâ-yı mezkûresiyle mesfûr Yani zimmîye bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Topkapılı Ârif Kavas kulları yediyle huzûr[-ı âlîlerine i‘lâm olundu] Fî 18 Receb sene [12]55