.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 99
Hüküm no: 74
Orijinal metin no: [17b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Karahisar-ı Şarki kazasının Olof nâhiyesi Fikaz Zaviyesi tasarrufunun Seyyid Şeyh Osman, Seyyid Hüseyin ve Seyyid Şeyh Mehmed’e tevcihi

Ma‘rûz,

Sâdır olan fermân-ı âlîlerine imtisâlen işbu arzuhâl ve derkenâra nazar olundukda medîne-i Karahisar-ı şarkî kazâsında Olof nâhiyesinde Fikaz zâviyesi evlâd ve evlâdına meşrûta ber-mûceb-i şart-ı vâkıf hisseye mutasarrıf olan es-Seyyid Mehmed b. İsmail fevt olup yeri hâlî ve hizmet-i lâzımesi mu‘attal kaldığından bahisle sahib-i arzuhâl müteveffâ-yı merkūmun sulbî oğulları es-Seyyid eş-Şeyh Osman ve es-Seyyid Hüseyin ve es-Seyyid eş-Şeyh Mehmed hisse-i mezbûre pederi müteveffâ-yı mezbûrun mahlûlünden kendülerine tevcîh ve yedlerine berat-ı âlîşân i‘tâsı istid‘â ederler fi’l-hakīka hisse-i mezbûr es-Seyyid Mehmed b. İsmail’in üzerinde olduğu askerî rûznâmçesi derkenârından müstebân ve merkūm es-Seyyid Mehmed’in fevti vâki‘ ve mezbûrûn sulbî oğulları ve erbâb-ı istihkākdan idiklerini kazâ-i mezbûr ahâlîlerinden Der-aliyye’de müsâfireten sâkinler Çukadaroğlu Osman ve İmâmoğlu Yusuf b. Halil nâm kimesnelerin alâ-tarîkı’ş-şehâde ihbârlarıyla zâhir ve mütehakkık olmağın bu sûretde ber-mûceb-i şart-ı vâkıf hisse-i mezkûreyi müteveffâ-yı merkūmun mahlûlünden oğulları merkūmûn es-Seyyid Şeyh Osman ve es-Seyyid Hüseyin ve es-Seyyid Şeyh Mehmed nâm karındaşlardan ale’l-iştirâki’s-seviy tevcîh ve yedlerine berat-ı şerîf-i âlîşân i‘tâsı muktezâ-yı hâlden idiği huzûr-ı âlîlerine i‘lâm olundu.

Fî 5 S sene [12]49