Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 103 Hüküm no: 93 Orijinal metin no: [10b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foti’nin borcunu ödemesi 450 guruş sulh, bedel-i sulhu ilzâm Ma‘rûz Arzuhâl eden Keresteci Yorgi v. Anaştaş nâm zimmî İstanbul Bâb Mahkemesi’nde meclis-i şer‘-i hatîrde neccâr tâifesinden derûn-ı arzuhâlde ismi mastûr Foti v. Yuvan nâm zimmî muvâcehesinde mersûm Foti zimmî zimmetinde bundan akdem mâlımdan ve yedimden iştirâ ve kabz eylediği ma‘lûmü’l-ecnâs ve’l-fiyat kereste semeninden bâkī bâ-temessük yedi yüz guruş alacak hakkım olmağla meblağ-ı mezkûru mersûm Foti zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Foti zimmî ile bi’t-tav‘ ve’r-rızâ üç yüz elli guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr dört yüz elli guruşun müdde‘î-i mersûm Yorgi zimmîye edâsıyla mersûm Foti zimmî ilzâm olunduğu huzûr[-ı âlîlerine i‘lâm olundu] Fî 7 Receb sene [12]55