|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 100 Hüküm no: 75 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Seydişehri kazasının şeyh-i seb‘alık görevinin Seyyid Ahmed’e tevcihi
Ma‘rûz,
Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i A[na]dolu’da Seydişehri kazâsında vâki‘ ehl-i hiref tâifesi üzerlerine bâ-berat-ı âlîşân şeyh-i seb‘a olan Abdullah fevt olup meşîhat-i mezkûreye mahlûlünden oğlu es-Seyyid Mehmed kendüye tevcîh ve bâ-berat ettirdiğinden bahisle sahib-i arzuhâl müteveffâ-yı merkūmun karındaşı es-Seyyid Ahmed b. Abdülvahhab cihet-i merkūmeyi Seyyid Mehmed’in ref‘inden kendüye tevcîh ve berat-ı âlî i‘tâsını istid‘â eder fi’l-hakīka şeyh-i seb‘alık-ı mezkûre Şeyh Abdullah mahlûlünden bâ-berat-ı âlî oğlu Seyyid Mehmed’in üzerinde olduğu derkenârdan müstebândır ve vâki‘ olan tevcîhâtı esnâfın ihtiyâr eyledikleri kimesneye kādı arzıyla olagelmiş ise dahi merkūm es-Seyyid Mehmed bî-idâre ve bed-lisân olarak esnâfları tekdîrden hâlî olmamağla esnâfların menfûru idiğini ve ammi es-Seyyid Ahmed dâ‘îleri umûr-ı esnâfa müdîr ve muktedir ve istikāmetle esnâfın muhtârları idiğini kazâ-i mezbûr ahâlîsinden kuzât-ı kirâmdan es-Seyyid Hasan Efendi b. İbrahim ve İsmail b. Mehmed ve Hüseyin b. Musa ve sâir sikāt-ı Müslimînin alâ-tarîkı’ş-şehâde ihbârlarıyla zâhir ve nümâyân olmağın bu sûretde meşîhat-ı mezbûre merkūm Seyyid Mehmed’in ref‘inden ammi sahib-i arzuhâl es-Seyyid Ahmed’e tevcîh ve yedine berat-ı âlîşân i‘tâsı re’y-i sâmîlerine menût idiği huzûr-ı âlîlerine i‘lân olundu.
Fî 21 M sene [12]49
|