Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 106 Hüküm no: 100 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın kiraladığı evi boşaltması Kapan-ı dakīk <> [kapısı dâhilinde] Elvanzâde mahallesinde menzil nizâ‘ına dâir Ma‘rûz Bekmezci esnâfından Ali Nuri Ağa b. İbrahim Edhem b. Abdullah tarafından husûs-ı âtîde vekîl olduğu Hafız İbrahim Edhem Ağa b. Hüseyin ve Mustafa Ağa b. Halil nâm kimesneler şehâdetleriyle ber-nehc-i şer‘î sâbit olan Halil Ağa b. Ali nâm kimesne uncu esnâfından Hafız Mehmed Efendi b. Eyüb hâzır olduğu hâlde İstanbul Bâb Mahkemesi’nde meclis-i şer‘-i münîrde es-Seyyid İbrahim Ağa b. es-Seyyid Ahmed nâm kimesne muvâcehesinde müvekkilim merkūm Ali Nuri Ağa İstanbul’da Kapan-ı dakīk kapısı dâhilinde Elvanzâde mahallesinde vâki‘ ma‘lûmü’l-hudûd mutasarrıf olduğu bir bâb vakıf menzilini merkūm es-Seyyid İbrahim Ağa’ya işbu sene-i mübâreke yani Cumâdelûlâsı gurresinde îcâr eder oldukda müvekkilim merkūm menzil-i mezkûru her ne zamân âhara ferâğ eder ise menzil-i mezkûrun icâresi fesh olunmak şartıyla târîh-i mezkûrdan sene-i âtî Saferi’l-hayrı gāyetine gelinceye değin beher şehr yüz kırk beş guruşdan bir seneliği cem‘an bin yedi yüz <> kırk guruşa merkūm es-Seyyid İbrahim Ağa’ya îcâr ve teslîm ol dahi ber-vech-i muharrer istîcâr ve kabûl ve ücret-i mezkûresi olan bin yedi yüz kırk guruşu müvekkilim merkūma def‘ ü teslîm ol dahi yedinden ahz u kabz etmişidi el-hâletü hâzihî müvekkilim merkūm Ali Nuri Ağa menzil-i mezkûru hâzır-ı merkūm Hafız Mehmed Efendi’ye çend rûz mukaddem bâ-re’y-i mütevellî ferâğ ve tefvîz edip ol vechile şart-ı mezkûr ile olan îcârın adem-i sıhhatine binâen menzil-i mezkûrun müddet-i merkūmede icâre-i mümâtelesi olan dört yüz yirmi beş guruş müvekkil-i merkūmun makbûzu olan bin yedi yüz kırk guruşdan fürû-nihâde olundukda bâkīsi olan bin üç yüz beş guruşu müvekkilim merkūmun yedinden geri ahz birle menzil-i mezkûru tahliye ve hâzır-ı merkūm Hafız Mehmed Efendi’ye teslîme merkūm es-Seyyid İbrahim Ağa’ya tenbîh olunmak bi’l-vekâle matlûbumdur [deyü] hâzır-ı merkūm Mehmed Efendi ile ma‘an da‘vâ ettikde merkūm es-Seyyid İbrahim Ağa cevâbında menzil-i mezkûru müvekkil-i merkūmdan ber-vech-i muharrer şehriye yüz kırk beş guruşdan bir seneliği bin yedi yüz kırk guruşa istîcârını ikrâr vekîl-i merkūmun ber-vech-i meşrûh şart-ı mezkûr müdde‘âsını inkâr etmekle müdde‘î-i vekîl-i merkūm ber-vech-i muharrer şart-ı mezkûr müdde‘âsını adl ve makbûlü’ş-şehâde idikleri ihbâr olunan Veliyyüddin Ağa b. Osman ve Mehmed Salih Ağa b. Mehmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı bâkī-i mezkûr bin üç yüz beş guruşu müvekkil-i mezbûr Ali Nuri Ağa’dan geri ahz birle menzil-i mezkûru tahliye ve hâzır-ı merkūm Hafız Mehmed Efendi’ye teslîme merkūm es-Seyyid İbrahim Ağa’ya tenbîh olunduğu huzûr[-ı âlîlerine i‘lâm olundu] Fî 4 Şa‘bân sene [12]55