Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 108 Hüküm no: 102 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hediye Hatun’un borcunu ödemesi 600 guruşa hüküm Ma‘rûz Derûn-ı arzuhâlde mezkûretü’l-ism mu‘arrefetü’z-zât Şerife Âişe bt. es-Seyyid Yusuf nâm hatun İstanbul Bâb Mahkemesi’nde meclis-i şer‘-i münîrde sâhibe-i arzuhâl mu‘arrefetü’z-zât Hediye bt. Ali nâm hatun muvâcehesinde merkūm Hediye Hatun’a bundan akdem mâlımdan iktirâz ve teslîm eylediğim üç yüz guruş ve ba‘dehu bin iki yüz elli üç senesi Recebi’l-ferdi’nin on beşinci günü yine mâlımdan idâne ve teslîm eylediğim altı yüz guruş ki cem‘an dokuz yüz guruşu mezbûre Hediye Hatun ber-vech-i muharrer yedimden iktirâz ve kabz ve umûruna sarfla istihlâk eylediğimden sonra merkūme Hediye Hatun meblağ-ı mecmû‘-ı mezkûr dokuz yüz guruşun altı yüz guruşu zimmetinde bana deyni olduğunu nâtık ve târîh-i mezkûr ile müverrah işbu meclis-i şer‘de ibrâz ve kırâat olunan bir kıt‘a temessüğü dahi yedime i‘tâ etmişidi el-hâletü hâzihî meblağ-ı mecmû‘-ı mezkûru mezbûre Hediye Hatun’dan hâlâ taleb ederim deyü da‘vâ ettikde ol dahi cevâbında müdde‘iyye-i mezbûreye ancak zimmetinde ber-vech-i muharrer altı yüz guruş deyni olduğunu nâtık temessük [i‘tâ] eylediğini ikrâr ve müdde‘iyye-i merkūmenin ziyâde üç yüz guruş müdde‘âsını inkârından gayrı meblağ-ı mezkûr altı yüz guruşun dahi dört yüz yirmi guruş[u] deyn-i sahîhim olup ma‘adâ yüz seksen guruşu bilâ-devr murâbahadır deyü merkūme Hediye Hatun’un mikdâr-ı mezkûrda eylediği def‘ini müdde‘iyye-i merkūme dahi inkâr etmekle müdde‘iyye-i mezbûre Âişe Hatun ziyâde üç yüz guruş müdde‘âsını ve dafi‘a-i merkūme yüz seksen guruş def‘ini isbâtdan izhâr-ı acz birle her biri talebleriyle âharın muvâcehesinde vech-i şer‘î üzere tahlîf olunmalarıyla mûcebince müdde‘iyye-i mezbûre üç yüz guruş da‘vâsı ve dafi‘a-i merkūme def‘-i mezkûreleriyle âhara bilâ-beyyine mu‘ârazadan ba‘de’l-men‘ merkūme Hediye Hatun’un sâlifü’l-beyân ikrâr ve i‘tirâfıyla lâzım gelen meblağ-ı mezkûr altı yüz guruşun müdde‘iyye-i mezbûre Âişe Hatun’a edâsıyla mezbûre Hediye Hatun ilzâm olunduğu huzûr[-ı âlîlerine i‘lâm olundu] Fî 6 Şa‘bân sene [12]55