Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 109 Hüküm no: 104 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşcı esnafından Seyyid Mehmed ve kardeşleri arasındaki miras ve alacak-verecek davalarının sulh ile neticelendiği 2132 guruşdan meccânen ibrâ Ma‘rûz Taşcı esnâfından olup medîne-i Kayseriye’ye tâbi‘ Zincirlidere karyesi ahâlîsinden sâhib-i arzuhâl es-Seyyid Mehmed ve es-Seyyid Osman ibney el-müteveffâ es-Seyyid Süleyman nâm kimesneler İstanbul Bâb Mahkemesi’nde meclis-i şer‘de li-ebeveyn er karındaşları derûn-ı arzuhâlde ismi mezkûr es-Seyyid İbrahim nâm kimesne hâzır olduğu hâlde kezâlik derûn-ı arzuhâlde isimleri mezkûr diğer li-ebeveyn er karındaşları es-Seyyid Ali ve es-Seyyid Salih nâm kimesneler muvâcehelerinde karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd biribirine muttasıl mûrisimiz müteveffâ-yı mezbûr Süleyman ve min-kıbeli’l-eb ceddemiz Şerife Kadın bt. Abdullah’a mevrûs ve Simon zimmîden müşterâ üç bâb menâzilde olan hisse-i irsiye ve hisse-i müşterâmızı her birimiz bundan akdemce beynimizde bi’t-terâzî iktisâm birle her birimiz hisse-i mu‘ayyenâtımızı âhar yedinden kabz edip ancak târîh-i i‘lâmdan yedi sene mukaddem biz taşcılık ücretimizden mahâll-i ma‘lûmede alacağımız olup karındaşlarımız mezbûrân es-Seyyid Ali ve es-Seyyid Salih’in emir ve tevkîlimizle makbûzları olan iki bin yüz otuz altı guruş ve mezbûrândan merkūm es-Seyyid Ali’nin medîne-i mezbûrede mütemekkin Sarrâf Agop zimmîye zimmetinde cihet-i ma‘lûmeden deyni olan iki yüz altmış guruş ve merkūm es-Seyyid Salih’in yine Sarrâf-ı mersûma deyni olan yüz altı guruş ki cem‘an üç yüz altmış altı guruş dâyinleri gāib-i mersûm Agop zimmînin Âsitâne-i aliyye’de vâki‘ Vâlide Hanı’nda mütemekkin şerîki ve kabza vekîli Asador zimmîye bi-şartı’r-rücû‘ emriyle mâlımızdan te’diye ve teslîm etmemizle ol vechile bi’l-mürâca‘a hakkımız olan üç yüz altmış altı guruş ki min-haysü’l-mecmû‘ iki bin beş yüz iki guruşun üç yüz yetmiş guruşunu kabz u istîfâ etmemizle bâkīsi olan iki bin yüz otuz iki guruşu bi’l-ma‘iyye mezbûrân es-Seyyid Ali ve es-Seyyid Salih’den hâlâ taleb <> ederiz deyü tasaddî eylediğimiz da‘vâmızdan meccânen fâriğler olmamızla bi’l-cümle zikr olunan husûslara ve hukūk-ı mîrâsa ve işbu târîhe gelince sâir cemî‘ hukūk-ı şer‘iyeye müte‘allika <> âmme-i de‘âvî ve kâffe-i mütâlebâtdan biz ve hâzır-ı merkūm es-Seyyid İbrahim ile ma‘an karındaşımız mezbûrân es-Seyyid Ali ve es-Seyyid Salih’in zimmetlerini onlar dahi kezâlik bizimle hâzır-ı merkūm es-Seyyid İbrahim’in zimmetlerini her birimiz ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile kabûlü hâvî ibrâ ve iskāt eyledik deyü ibrâ ve tasâdıkları tescîl ve huzûr[-ı âlîlerine i‘lâm olundu] Fî 28 Receb sene [12]55