Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 110 Hüküm no: 105 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın boşadığı hanımı Zeynep Hatun’a olan borcunu ödemesi Tatlîk i‘lâmı Ma‘rûz İstanbul’da Hırka-i şerîf kurbünde Akseki mahallesinde sâkine derûn-ı arzuhâlde mezkûretü’l-ism mu‘arrefetü’z-zât Zeyneb bt. Ahmed nâm hatun İstanbul Bâb Mahkemesi’nde meclis-i şer‘de zevc-i mutallıkı sâhib-i arzuhâl el-Hâc Mustafa Ağa b. Mehmed nâm kimesne muvâcehesinde mezbûr el-Hâc Mustafa yüz bir guruş mehr-i müeccel tesmiyesiyle zevc-i dâhilim iken işbu târîh-i i‘lâmdan bir gün mukaddem beni tatlîk etmekle mezbûrun zimmetinde mehr-i müeccel-i mezkûrum olan yüz bir guruşu bana edâya ve iddetim inkızâsına değin beni infâka zevcim mezbûra tenbîh olunmak matlûbumdur deyü da‘vâ ettikde ol dahi cevâbında müdde‘iyye-i mezbûre Zeyneb Hatun yüz bir guruş mehr-i müeccel tesmiyesiyle zevce-i menkûha-i medhûlün-bihâsı olduğunu ve ber-vech-i muharrer tatlîkini ikrâr ü i‘tirâf etmeğin mûcebince mehr-i müeccel-i mezkûr yüz bir guruşu hâlen ve nafaka-i iddet-i bakiye-i ma‘lûme ve me’ûnet-i süknâsı mukābelelerinde bi’t-terâzî beynlerinde ta‘yîn olunan kırk dokuz guruşu hîn-i istihkākda müdde‘iyye-i mezbûre Zeyneb Hatun’a edâya mezbûr el-Hâc Mustafa Ağa’ya tenbîh olunduğu huzûr[-ı âlîlerine i‘lâm olundu] Fî 6 Şa‘bân sene [12]55