Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 111 Hüküm no: 106 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mihal’in alacaklı olduğu yolundaki iddiasını ispatlayamadığı [Men‘] Ma‘rûz Tütüncü tâifesinden Mihal v. Vilko nâm zimmî İstanbul Bâb Mahkemesi’nde meclis-i şer‘-i hatîrde yine tâife-i mersûmeden Kostandi v. Dimitri nâm zimmî muvâcehesinde mersûmun zimmetinde târîh-i i‘lâmdan iki sene mukaddem mâlımdan ve yedimden iştirâ ve kabz eylediği vezn ve fiâtı beynimizde ma‘lûm Yenice duhânı semeninden ba‘de külli’l-hesâb gayr-ı ez-teslîmât sahhu’l-bâkī iki yüz on iki guruş alacak hakkım olmağla meblağ-ı bâkī-i mezkûru mersûm Kostandi zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben deynim olan meblağ-ı bâkī-i mezkûr iki yüz on iki guruşu bundan akdem müdde‘î-i mesfûra edâ ve teslîm etmişidim deyü müdde‘î-i mersûm Mihal zimmînin inkârına mukārin eylediği def‘ini isbâtdan izhâr-ı acz edip istihlâf ettikde müdde‘î-i mersûm Mihal zimmî yemînden nükûl [12b] etmeğin mûcebince müdde‘î-i mersûm Mihal zimmî da‘vâ-yı mezkûresiyle mersûm Kostandi zimmîye bî-vech-i şer‘î mu‘ârazadan men‘ olunduğu mübâşirleri Bâb-ı Seraskerî kavaslarından Ahmed Kavas kulları yediyle huzûr[-ı âlîlerine i‘lâm olundu] Fî 7 Şa‘bân sene [12]55