Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 111 Hüküm no: 107 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa Ağa’nın borcunu ödemesi 1500 guruşa hüküm Ma‘rûz Arzuhâl eden Mekkârî Musa b. Salih İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûr Tatar es-Seyyid Mustafa b. es-Seyyid Osman nâm kimesne muvâcehesinde târîh-i i‘lâmdan iki sene mukaddem merkūm es-Seyyid Mustafa Ağa’nın kırk denk götürünü iki bin üç yüz guruş kirâ mukāvelesiyle Rumeli’de Leskofça kazâsından yirmi re’s bârgirime tahmîl ile Âsitâne-i aliyyeye ve Âsitâne-i aliyye’den dört denk malifaturasını yüz yirmi beş guruş kirâ mukāvelesiyle iki re’s bârgirime tahmîl ile Rumeli’de Pirlepe kazâsına götürmemle ol vechile yirmi dört re’s bârgirin ber-vech-i muharrer kirâları olan cem‘an iki bin beş yüz kırk guruş ve bi-şartı’r-rücû‘ emriyle esnâ-i râhda derbendlerde ma‘lûmü’l-esâmî kimesnelere mâlımdan medfû‘um olan yüz otuz guruş ve semen-i mebî‘den otuz guruş ki min-haysü’l-mecmû‘ mezbûr es-Seyyid Mustafa zimmetinde hakkım olan iki bin yedi yüz guruşun bin iki yüz guruşunu mukaddemâ kabz u istîfâ etmemle bâkīsi olan bin beş yüz guruşu merkūm es-Seyyid Mustafa Ağa’dan hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr lâkin deynim olan meblağ-ı mezkûr bin beş yüz guruşun yüz otuz guruşunu dahi müdde‘î-i merkūm Musa’ya mukaddemâ edâ ve teslîm etmemle ol vechile zimmetimde bin üç yüz yetmiş guruş deynim bâkī kalmışdır deyü inkâra mukārin eylediği def‘ine ikāmet-i beyyine edemeyip bi’t-taleb mezbûr Musa bi’l-muvâcehe ber-nehc-i şer‘î tahlîf olunmağın mûcebince dâfi‘-i merkūm es-Seyyid Mustafa Ağa def‘-i mezkûruyla <> merkūm Musa’ya bilâ-beyyine mu‘ârazadan ba‘de’l-men‘ merkūm es-Seyyid Mustafa Ağa’nın ikrârıyla lâzım gelen meblağ-ı bâkī-i mezkûr bin beş yüz guruşun müdde‘î-i merkūm Musa’ya edâsıyla merkūm es-Seyyid Mustafa Ağa ilzâm olunduğu huzûr[-ı âlîlerine i‘lâm olundu] Fî 5 Şa‘bân sene [1]255