.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 100
Hüküm no: 76
Orijinal metin no: [17b-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Niksar’ın Cedîd mahallesindeki Hoca Sultan Mescidi nısf imamet cihetinin Seyyid Hafız Abdullah’a tevcihi

Ma‘rûz,

Sâdır olan fermân-ı âlîlerine imtisâlen işbu arz ve derkenâra nazar olundukda Anadolu’da medîne-i Niksar kazâsında Cedîd mahallesinden vâki‘ Hoca Sultan Mescid-i şerîfinde yevmî bir akçe vazîfe ile imâmet cihetine mutasarrıf olan es-Seyyid Hâfız Abdülvahhab b. Ahmed fevt olup cihet-i mezkûre vazîfe-i mersûmesiyle sulbî oğulları derûn-ı arzda isimleri mezkûr es-Seyyid Hâfız Hüseyin ve es-Seyyid Hâfız Abdullah’a ber-vech-i iştirâk tevcîhi iktizâ eder iken merkūm es-Seyyid Hâfız Hüseyin karındaşı mezbûr es-Seyyid Hâfız Abdullah’ı ketm ve ihfâ ederek bir takrîb kazâ-i mezbûr nâibi esbak es-Seyyid el-Hâc Ahmed Efendi’den aldığı bir kıt‘a arz mûcebince müstakillen kendüye tevcîh ve üzerine berat ettirmiş ise de bu def‘a kazâ-i mezbûr nâibi es-Seyyid eş-Şeyh Mehmed Efendi dâ‘îlerinin işbu mührü mutâbık arzda cihet-i mezkûrenin nısf hissesi merkūm es-Seyyid Hâfız Hüseyin’in ref‘inden pederi müteveffâ-yı mezbûr es-Seyyid Hâfız Abdülvahhab mahlûlünden merkūm es-Seyyid Hâfız Abdullah’a tevcîh olunmasını inhâ etmeğin fi’l-hakīka cihet-i mezkûre müteveffâ-yı merkūm es-Seyyid Hâfız Abdülvahhab’ın mahlûlünden sulbî kebîr oğlu es-Seyyid Hâfız Hasan’a tevcîh olunup üzerinde olduğu derkenârdan müstebân ve mezbûr es-Seyyid Hâfız Abdullah merkūm es-Seyyid Hâfız Hüseyin’in karındaşı ve müteveffâ-yı merkūmun sulbî oğlu olduğunu kazâ-i mezbûr ahâlîsinden Der-aliyye’de müsâfireten sâkinler Yüzbaşıoğlu Mustafa b. Mehmed ve Abdullah b. Ali nâm kimesneler dahi haber vermeleriyle cihet-i mezkûrenin nısf hissesi vazîfe-i mersûmesiyle merkūm es-Seyyid Hâfız Hüseyin’in ref‘inden pederi müteveffâ-yı mezbûr mahlûlünden merkūm es-Seyyid Hâfız Abdullah üzerine tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu.

Fî-sene ( ).