Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 115 Hüküm no: 113 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman’ın borcunu ödemesi 250 guruşa sulh Ma‘rûz Derûn-ı arzuhâlde mezkûrü’l-ism Örücü İsmail b. el-Hâc İbrahim İstanbul Bâb Mahkemesi’nde meclis-i şer‘-i münîrde es-Seyyid Osman b. Halil muvâcehesinde sâhib-i arzuhâl Tütüncü Mehmed b. Mehmed hâzır olduğu hâlde ben bin iki yüz kırk beş senesi Muharremi’l-harâm’ın yirmi birinci günü mahrûse-i Galata’da Azepkapısı dâhilinde boyacı ittisâlinde kâin bir bâb tütüncü dükkânı derûnunda mevcûde beyne’l-esnâf gedik ta‘bîr olunur müstakıllen mâlik olduğum âlât-ı lâzıme-i ma‘lûmemi bin dokuz yüz guruş semen tesmiyesiyle mezbûr es-Seyyid Osman’a bey‘ u teslîm eylediğimde ol dahi ba‘de’l-iştirâ semen-i mezkûr bin dokuz yüz guruşun altı yüz guruşunu mukaddemâ kabz u istîfâ etmemle bâkīsi olan bin üç yüz guruşu mezbûr es-Seyyid Osman’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr es-Seyyid Osman ile bi’t-tav‘ ve’r-rızâ iki yüz elli guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz elli guruşun müdde‘î-i mezbûr İsmail’e edâsıyla mezbûr es-Seyyid Osman ilzâm olunduğu huzûr[-ı âlîlerine i‘lâm olundu] Fî 22 Receb sene [12]55