Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 116 Hüküm no: 116 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin borcunu ödemesi 300 guruşa hüküm Ma‘rûz Bâ‘isü’l-i‘lâm Osman Ağa b. Hüseyin nâm kimesne İstanbul Bâb Mahkemesi’nde meclis-i şer‘-i münîrde nüvvâbdan es-Seyyid Mustafa Efendi b. Mustafa nâm kimesne muvâcehesinde târîh-i i‘lâmdan sekiz sene mukaddem merkūm es-Seyyid Mustafa Efendi zimmetinde cihet-i karzdan dört yüz guruş alacak hakkım olup merkūm es-Seyyid Mustafa Efendi bundan akdem mâlından bir re’s doru tayı üç yüz guruşa bey‘ ve yine kezâlik mâlından bir kilimini yüz guruşa bey‘ ve temlîk ve teslîm > ve ben dahi yedinden ber-vech-i muharrer iştirâ ve temellük ve tesellüm ve kabz ve kabûl eylediğimden sonra semenleri olan meblağ-ı mecmû‘-ı mezkûr dört yüz guruşu merkūm es-Seyyid Mustafa Efendi zimmetinde alacağım olan meblağ-ı mezkûr dört yüz guruşa bi’t-terâzî takās ve mahsûb ve ol vechile istîfâ-yı hak etmişidim lâkin ben zikr olunan tayı gāib ani’l-meclis Müezzinbaşı Ahmed Efendi ahırına rabt ve tevdî‘ eylediğimde mezbûr es-Seyyid Mustafa Efendi zikri mürûr eden tayı benim iznimsiz fuzûlî ve bi-gayri hakkın ahz ve yedinde mevcûd iken helâk olmağla zikr olunan tayın kıymet-i şer‘iyesini merkūm es-Seyyid Mustafa Efendi’den tazmîn taleb ederim deyü da‘vâ ettikde ol dahi cevâbında ber-vech-i muharrer ikrâr lâkin müdde‘î-i merkūm Osman Ağa mârru’z-zikr tayı gāib-i merkūm Ahmed Efendi’ye hibe ve temlîk ve tesîm edip ol dahi mâl-ı mevhûbu iken kezâlik bana hibe ve temlîk ve teslîm etmişidi deyü müdde‘î-i merkūmun inkârına mukārin eylediği def‘ini isbâtdan izhâr-ı acz edip bi’t-taleb müdde‘î-i merkūm Osman Ağa bi’l-muvâcehe vech-i şer‘î üzere tahlîf olunmağın mûcebince dâfi‘-i merkūm es-Seyyid Mustafa Efendi def‘-i mezkûruyla müdde‘î-i merkūm Osman Ağa’ya bilâ-beyyine mu‘ârazadan ba‘de’l-men‘ ikrâr ü i‘tirâfı mûcebince tay-ı mezkûrun kıymeti idiğini tasdîk eylediği üç yüz guruşu müdde‘î-i merkūm Osman Ağa’ya damânen edâ ve teslîme merkūm es-Seyyid Mustafa Efendi’ye tenbîh olunduğu bi’l-iltimâs huzûr[-ı âlîlerine i‘lâm olundu] Fî 29 Receb sene [12]55