Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 117 Hüküm no: 117 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tezgahçı Mustafa’nın Sandıkçı Mehmed aleyhine açtığı davada haksız bulunduğu 690 guruş mu‘ârazadan men‘ Ma‘rûz Destgâhcı Mustafa b. Osman nâm kimesne İstanbul Bâb Mahkemesi’nde meclis-i şer‘-i münîrde Sandıkcı Mehmed b. Mehmed nâm kimesne muvâcehesinde mezbûr Mehmed işbu târîh-i i‘lâmdan üç ay mukaddem İstanbul’da Atpazarı kurbünde Arabacılar Han’ı derûnunda ammim gāib ani’l-meclis Ahmed nâm kimesnenin odasına girip tahta sandığı derûnunda mevdû‘ gāib-i mezbûrun mâlı olan bin üç yüz guruş nakdini hufyeten ahzeder iken ben merkūm Mehmed’in üzerine geldiğimde mezbûr Mehmed meblağ-ı mezbûrun altı yüz on guruşunu bana verip ma‘adâ altı yüz doksan guruşunu kendi ahzeylediğinden sonra ammim gāib-i mezbûr keyfiyet-i hâle muttali‘ oldukda beni zâbit ma‘rifetiyle Bâb-ı seraskerî’ye irsâl ve meblağ-ı mezbûr bin üç yüz guruşu benden tahsîl ve ahzetmişidi el-hâletü hâzihî mezbûr Mehmed’in ammi gāib-i mezbûrun mâlından ber-vech-i muharrer makbûzu olan altı yüz doksan guruşu bana vermek üzere merkūm Mehmed’e tenbîh olunmak matlûbumdur deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûr Mustafa Ağa’ya tefhîm ve da‘vâ-yı mezkûresiyle mezbûr Mehmed’e bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 4 Şa‘bân sene [12]55