Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 119 Hüküm no: 120 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin sulh bedelini Kâhya Anesti’ye ödemesi 380 guruşa sulh, bedel-i sulhu ilzâm Ma‘rûz İstanbul hısnı ebvâbından Eğrikapı dâhilinde kâin Meryem Ana Kilisesi mahallesi Kâhyası Anesti v. Niko nâm zimmî İstanbul Bâb Mahkemesi’nde meclis-i şer‘-i hatîrde Cizyehâne çavûşânından Yorgi v. Vasil nâm zimmî muvâcehesinde ben târîh-i i‘lâmdan üç ay mukaddem zikr olunan Eğrikapı dâhilinde Berber Hasan Ağa’nın dükkânında mersûm Yorgi zimmîye Cizyehâne memûrlarından ma‘lûmü’l-esâmî dâyinlerime ver deyü ceste ceste verdiğim altı yüz yetmiş guruşun yüz doksan guruşunu te’diye edip bâkīsi olan dört yüz seksen guruşu dâyinlerime vermeyip bi-gayri hakkın kendi umûruna sarfla istihlâk etmekle meblağ-ı mezkûr dört yüz seksen guruşu mesfûr Yorgi zimmîden damânen taleb ederim deyü tasaddî eylediğim da‘vâmdan bâ-tavassut-ı muslihîn mersûm Yorgi zimmî ile bi’t-tav‘ ve’r-rızâ üç yüz seksen guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr üç yüz seksen guruşun müdde‘î-i mesfûr Anesti zimmîye edâ ve teslîmiyle mersûm Yorgi zimmî ilzâm olunduğu mübâşirleri Bâb-ı Seraskerî kavaslarından Yenibahçeli Abdurrahman Kavas kulları yediyle huzûr[-ı âlîlerine i‘lâm olundu] Fî 7 Şa‘bân sene [12]55