Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 119 Hüküm no: 121 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Veliyyüddin’nin Nikola aleyhine açtığı kefalet davasının geçersiz olduğu 441 guruş kefâletden men‘ Ma‘rûz Tütüncü esnâfından Veliyyüddin b. Ali nâm kimesne İstanbul Bâb Mahkemesi’nde meclis-i şer‘-i münîrde yine esnâf-ı merkūmeden Nikola v. Yorgi nâm zimmî muvâcehesinde benim esnâf-ı mezbûreden olup bundan akdem hâlik olan Yuvan zimmî zimmetinde târîh-i i‘lâmdan dört sene mukaddem sağlığında mâlımdan ve yedimden iştirâ ve kabz eylediği ma‘lûmü’l-vezn ve’l-fiyat duhân semeninden dört yüz kırk bir guruş alacak hakkıma işbu mersûm Nikola zimmî tarafeynden bi’l-emr ve’l-kabûl kefâlet-i sahîha-i şer‘iye ile kefîl ve dâmin olmuşidi el-hâletü hâzihî meblağ-ı mezkûr dört yüz kırk bir guruşu medyûnum mersûm Yuvan zimmî kable’l-edâ ve’l-îfâ hâlik olmağla meblağ-ı mezkûr dört yüz kırk bir guruşu mesfûr Nikola zimmîden hâlâ kefâlet-i mahkiyesine binâen taleb ederim deyü ba‘de’d-da‘vâ ve’l-inkâr müdde‘î-i merkūm Veliyyüddin ber-vech-i muharrer müdde‘âsına ikāmet-i beyyine edemeyip talebiyle mersûm Nikola zimmîye bi’l-muvâcehe vech-i şer‘î üzere yemîn verilmeğin mûcebince müdde‘î-i mezbûr Veliyyüddin da‘vâ-yı mezkûresiyle mersûm Nikola zimmîye bilâ-beyyine mu‘ârazadan men‘ olunduğu huzûr[-ı âlîlerine i‘lâm olundu] Fî 16 Şa‘bân sene [12]55