Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 121 Hüküm no: 125 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Bey ile Berber İbrahim Ağa arasındaki alacak-verecek davasında karar verilemediği Mazbata kaydı Ma‘rûz Mehmed Said Bey b. Mehmed Nazif İstanbul Bâb Mahkemesi’nde meclis-i şer‘-i münîrde Berber es-Seyyid İbrahim Ağa b. es-Seyyid Ali nâm kimesne muvâcehesinde merkūm es-Seyyid İbrahim Ağa İstanbul’da Sultanbayezid mahallesinde Yahya Kapan [Kaptan] sokağında vâki‘ mutasarrıf olduğu bir bâb vakıf menzil arsası üzerine bundan akdem bir bâb menzil binâ ve inşâ eylediği esnâda merkūm es-Seyyid İbrahim Ağa’nın bi-şartı’r-rücû‘ emriyle kendi için âhardan iştirâ eylediğim beş bin kiremit semenine mâlımdan medfû‘um olan dört yüz yirmi beş guruş ve beş bin tuğla semenine kezâlik üç yüz yetmiş beş guruş ve altmış kantar kireç semenine üç yüz altmış guruş ve yüz aded Sarot tahtası semenine iki yüz on iki buçuk guruş ve iki yüz aded Eğricik tahtasına iki yüz yirmi guruş ve yirmi aded kestâne kolluğuna otuz beş guruş ve yüz altı vakıyye Salış mismârına altı yüz seksen dokuz guruş ve yüz on üç buçuk vakıyye <> Zağra mismârına üç yüz dört buçuk guruş ve doğramacıkârî iki kanadlı sokak kapısına yetmiş guruş ve kapı âlâtına kırk guruş ve ma‘lûmü’l-vakıyye revgan-ı neft semenine dört yüz kırk beş guruş ve ma‘lûmü’l-esâmî neccârlara ve zikr olunan kerestelerin hammaliyelerine üç yüz beş guruş ki min-haysü’l-mecmû‘ medfû‘âtımdan mezbûr es-Seyyid İbrahim Ağa zimmetinde bi’l-mürâca‘a hakkım olan üç bin beş yüz yirmi iki guruşun bin altmış sekiz guruşunu mukaddemâ merkūm es-Seyyid İbrahim Ağa’dan ahz ü istîfâ etmemle bâkīsi olan iki bin dört yüz kırk dört guruşu mezbûr es-Seyyid İbrahim’den hâlâ taleb ederim deyü da‘vâ ettikde ol dahi cevâbında müdde‘î-i mezbûr Mehmed Said Bey’in ber-vech-i meşrûh müdde‘âlarından cem‘an iki bin beş yüz on altı buçuk guruş müdde‘âsını ikrâr ziyâde bin altı buçuk guruş müdde‘âsını inkârından gayrı müdde‘î-i merkūmun kabzını mu‘terif olduğu bin yetmiş sekiz guruşdan mâ‘adâ müdde‘î-i mezbûr Mehmed Said’e mâlımdan ceste ceste bin sekiz yüz elli üç guruş dahi medfû‘âtım olmağla ol vechile müdde‘î-i mezbûr Mehmed Said Bey’e medfû‘âtım olan cem‘an iki bin dokuz yüz otuz bir guruşun iki bin beş yüz on altı buçuk guruşu deynim olan mezkûr iki bin [15a] beş yüz on altı buçuk guruşa takās ve mahsûb olunup mâ‘adâsı olan dört yüz on dört buçuk guruşu mezbûr Mehmed Said Bey’den istirdâd ederim deyü eylediği bin sekiz yüz elli üç guruş def‘ini müdde‘î-i merkūm Mehmed Said Bey inkâr etmekle müdde‘î-i merkūm Said Bey’in ziyâde bin altı buçuk guruş müdde‘âsıyla ve dâfi‘-i mezbûr es-Seyyid İbrahim Ağa mezkûr bin sekiz yüz elli üç guruş def‘iyle her biri beyâna havâle olunup tarafeyn bir daha meclis-i şer‘e gelmemeleriyle henüz <> da‘vâlarına faysal verilmedi on bir gün mukaddem târîhiyle cerîde-i kâtibde mazbût bulunmağın imtisâlen-li’l-emr-i âlî sûret-i zabtı huzûr[-ı âlîlerine i‘lâm olundu] Fî 16 Şa‘bân sene [12]55