Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 122 Hüküm no: 126 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan Ağa’nın boşadığı hanımının mehrini ödemesi Tatlîk, 160 guruş mehreyn edâya tenbîh i‘lâmı Ma‘rûz İstanbul’da Kaliçeciler köşkü kurbünde Öksüzcehatib mahallesinde sâkine mu‘arrefetü’z-zât Şerife Fâtıma bt. es-Seyyid Hasan nâm hatun İstanbul Bâb Mahkemesi’nde meclis-i şer‘-i münîrde zevc-i mutallıkı Yemenîci es-Seyyid Hasan Ağa b. es-Seyyid İsmail nâm kimesne muvâcehesinde mezbûr es-Seyyid Hasan Ağa üç yüz guruş mehr-i mu‘accel ve yüz on bir guruş mehr-i müeccel tesmiyeleriyle zevc-i dâhilim iken târîh-i i‘lâmdan üç gün mukaddem beni tatlîk etmekle zimmetinde mehreyn-i mezkûreynim olan cem‘an dört yüz on bir guruşu hâlâ bana edâya ve iddetim inkızâsına değin beni infâka zevcim mezbûra tenbîh olunmak matlûbumdur deyü da‘vâ ettikde ol dahi cevâbında müdde‘iyye-i mezbûre Şerife Fâtıma Hatun ol mikdâr mehr-i mu‘accel ve yüz on bir guruş mehr-i müeccel tesmiyeleriyle zevce-i menkûha-i medhûlün-bihâsı olduğunu ve ber-vech-i muharrer tatlîkini ikrâr ü i‘tirâf etmeğin mûcebince mehreyn-i mezkûreyni olan dört yüz on bir guruşu hâlen ve nafaka-i iddet-i bakiye-i ma‘lûme ve me’ûnet-i süknâsı mukābelelerinde bi’t-terâzî beynlerinde ta‘yîn olunan yüz altmış guruşu dahi hîn-i istihkākda zevcesi müdde‘iyye-i mezbûreye edâya merkūm es-Seyyid Hasan Ağa’ya tenbîh olunduğu huzûr[-ı âlîlerine i‘lâm olundu] Fî 20 Şa‘bân sene 1255