Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 123 Hüküm no: 127 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülhalim Ağa’nın hanımına olan mehir borcunu ödemesi Mu‘accel hükmü Ma‘rûz İstanbul’da Langa-i sagīr kurbünde Kâtip Kasım mahallesinde sâkine mu‘arrefetü’z-zât Hadice bt. Ali nâm hatun İstanbul Bâb Mahkemesi’nde meclis-i şer‘-i münîrde hâlâ zevci etbâ‘îden Abdülhalim Ağa b. Mehmed nâm kimesne muvâcehesinde ben bundan akdem nefsimi yedi yüz guruş mehr-i mu‘accel ve beş yüz elli guruş mehr-i müeccel tesmiyeleriyle mezbûr Abdülhalim Ağa’ya tezvîc ve tenkîh eylediğimde ol dahi tezevvüc ve duhûl edip lâkin mehr-i müeccel-i [mu‘accel] mezkûrumu henüz bana edâ ve îfâ etmemekle suâl olunup mehr-i mu‘accel-i merkūm yedi yüz guruşu bana edâya zevcim mezbûr Abdülhalim Ağa’ya tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihi tâyi‘an ve kat‘iyyen ikrâr ü i‘tirâf etmeğin mûcebince mehr-i müeccel-i [mu‘accel] mezkûr yedi yüz guruşu zevcesi müdde‘iyye-i merkūme Hadice Hatun’a edâya zevci mezbûr Abdülhalim Ağa’ya tenbîh olunduğu huzûr-ı âlîlerine i‘lâm olundu el-emru li-men-lehü’l-emr fi’l-yevmi’l-hâdî ve’l-ışrîn min-Şa‘bâni’l-mu‘azzam li-sene hamse ve hamsîn ve mi’eteyn ve elf.