Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 123 Hüküm no: 128 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize Hanım’ın Yahudi Hayim aleyhine açtığı davasını ispatlayamadığı Mu‘ârazadan men‘ Ma‘rûz Mahrûse-i Galata’ya muzâfe Beşiktaş kasabası mahâllâtından Sinan Paşa mahallesinde sâkine mu‘arrefetü’z-zât Hacce Hafize bt. Mustafa nâm hatun İstanbul Bâb Mahkemesi’nde meclis-i şer‘de İstanbul’da Mahmudpaşa Çarşısı’nda vâki‘ Aynacı Hayim v. İsak nâm zimmî muvâcehesinde ben işbu târîhden dört ay mukaddem mâlım olup işbu meclis-i şer‘de mu‘âyene olunan gezi üzerine masnû‘ mukavva ayna kabımı mersûm Hayim Yahûdi’ye ayna geçirmek içün teslîm eylediğimde ol dahi ba‘de’l-ahz zikr olunan kabın üzerinde mevcûd dört yüz elli guruş kıymetli üç miskāl inciyi fuzûlî ahzetmekle mevcûd ise aynı müstehlek ise ba‘de’s-sübût kıymet-i mezkûresi olan dört yüz elli guruşu mersûm Hayim Yahûdi’den tazmîn taleb ederim deyü ba‘de’d-da‘vâ ve’l-inkâr müdde‘iyye-i mezbûre ber-vech-i muharrer müdde‘âsına ikāmet-i beyyine ede[meyip] bi’t-taleb mersûm Hayim Yahûdi’ye bi’l-muvâcehe vech-i şer‘î üzere yemîn verilmeğin mûcebince müdde‘iyye-i mezbûre ber-vech-i muharrer da‘vâ-yı mezkûresiyle mersûm Hayim Yahûdi’ye bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Veliyyüddin Kavas kulları yediyle huzûr[-ı âlîlerine i‘lâm olundu] Fî 15 Şa‘bân sene [12]55