Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 124 Hüküm no: 129 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop’un borcunu ödemesi 250 guruşa hüküm Ma‘rûz Sahtiyân tüccârından es-Seyyid Mehmed Ağa b. Mehmed İstanbul’da Bâb Mahkemesi’nde meclis-i şer‘de Mergubcu Agop v. Haçador nâm zimmî muvâcehesinde mersûmun zimmetinde bundan akdem mâlımdan ve yedimden iştirâ ve kabz eylediği siyah boyalı sahtiyân semeninden 1350 guruş alacak hakkımın 1100 guruşunu mukaddemâ mersûmun yedinden kabz u istîfâ etmemle bâkīsi olan 250 guruşu zimmî-i mersûmdan hâlâ taleb ederim deyü da‘vâ ettikde ol dahi cevâbında ikrâr lâkin deynim olan meblağ-ı bâkī-i mezkûr iki yüz elli guruşun yüz on guruşunu dahi müdde‘î-i mezbûra edâ etmemle bâkī zimmetimde 140 guruş deynim kalmışdır deyü müdde‘î-i mezbûr es-Seyyid Mustafa Ağa’nın inkârına mukārin eylediği ziyâde 110 guruş def‘ine mersûm Agop zimmî ikāmet-i beyyine edemeyip tahlîse [tahlîfe] dahi tâlib olmamağın mûcebince dâfi‘-i mesfûr Agop zimmî def‘-i mezkûruyla mersûm es-Seyyid Mehmed Ağa’ya bilâ-beyyine mu‘ârazadan ba‘de’l-men‘ sâlifü’l-beyân ikrârıyla lâzım gelen meblağ-ı bâkī-i mezkûr iki yüz elli guruşu müdde‘î-i mezbûr es-Seyyid Mehmed Ağa’ya edâ ve teslîme mersûm Agop zimmîye tenbîh olunduğu mübâşirleri Bâb-ı Seraskerî kavaslarından Edirnekapılı Emrullah Kavas kulları yediyle huzûr-ı âlîlerine [i‘lâm olundu] Fî 4 Şa‘bân sene [12]55