Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 124 Hüküm no: 130 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin boşadığı hanımına mehir ve nafaka ödemesi Tatlîk Ma‘rûz İstanbul’da Destgâhcılar kurbünde Mağnisalı (Manisalı) Mehmedpaşa mahallesinde sâkine mu‘arrefetü’z-zât Şerife Nimetullah bt. Ali nâm hatun İstanbul Bâb Mahkemesi’nde meclis-i şer‘de zevc-i mutallıkı Midillici es-Seyyid Ali b. Mustafa muvâcehesinde mezbûr Ali altmış bir guruş mehr-i müeccel tesmiyesiyle zevc-i dâhilim olup işbu târîh-i i‘lâm günü beni tatlîk etmekle mezbûrun zimmetinde mehr-i müeccel-i mezkûrum olan altmış bir guruşu hâlâ bana edâya ve iddetim inkızâsına değin beni infâka zevcim mezbûra tenbîh olunmak matlûbumdur deyü da‘vâ ettikde ol dahi cevâbında müdde‘iyye-i mezbûre Şerife Nimetullah Hatun altmış bir guruş mehr-i müeccel tesmiyesiyle zevce-i menkûha-i medhûlün-bihâsı olduğunu ve ber-vech-i muharrer tatlîkini ikrâr ü i‘tirâf etmeğin mûcebince mehr-i müeccel-i mezkûr altmış bir guruşu hâlen ve nafaka-i iddet-i ma‘lûme ve me’ûnet-i süknâsı mukābelelerinde bi’t-terâzî beynlerinde ta‘yîn olunan dokuz guruşu dahi hîn-i istihkākda zevcesi mezbûre Şerife Nimetullah Hatun’a edâya mezbûr Ali’ye tenbîh olunduğu mübâşirleri Bâb-ı Seraskerî kavaslarından Bursalı Ömer Kavas kulları yediyle huzûr[-ı âlîlerine i‘lâm olundu] Fî 21 Şa‘bân sene 1255