Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 125 Hüküm no: 131 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazire Hanım’ın misafir bulunduğu evde parasının bir kısmının çalındığı yolundaki iddiasını ispatlayamadığı Mu‘ârazadan men‘ Ma‘rûz İstanbul’da Küçükkaraman kurbünde Hocahayreddin mahallesinde sâkine sâhibe-i arzuhâl mu‘arrefetü’z-zât Nazire bt. Ali nâm hatun İstanbul Bâb Mahkemesi’nde meclis-i şer‘de derûn-ı arzuhâlde mezkûretü’l-ism kezâlik zâtı mu‘arrefe Şerife Rukiye bt. İsmail nâm hatun muvâcehesinde benim işbu târîh-i i‘lâmdan bir hafta mukaddem mezbûre Şerife Rukiye Hatun’a İstanbul’da Altıay Çeşmesi kurbünde Debbâğzâde el-Hâc Hasan mahallesinde vâki‘ müsâferet tarîkiyle menziline varıp yedimde mâlım olan bir beyaz kese derûnunda mevdû‘ bin guruşumu mezbûrenin emriyle menzil-i mezkûrun dolabına vaz‘ etmişidim el-hâletü hâzihî mezbûre Şerife Rukiye Hatun zikr olunan keseyi bana teslîm edip ancak bin guruşun yüz doksan beş guruşunu hufyeten fuzûlî ahz ü istîfâ etmekle meblağ-ı mezkûr yüz doksan beş guruşu mezbûre Şerife Rukiye Hatun’dan damânen taleb ederim deyü ba‘de’d-da‘vâ ve’l-inkâr müdde‘iyye-i mezbûre ber-vech-i muharrer müdde‘âsına ikāmet-i beyyine edemeyip bi’t-taleb mezbûre Şerife Rukiye Hatun bi’l-muvâcehe vech-i şer‘î üzere tahlîf olunmağın mûcebince müdde‘iyye-i mezbûre Nazire Hatun da‘vâ-yı mezkûresiyle mezbûre Rukiye Hatun’a bilâ-beyyine mu‘ârazadan men‘ olunduğu huzûr[-ı âlîlerine i‘lâm olundu] Fî 19 Şa‘bân sene [12]55