Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 126 Hüküm no: 132 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atiye Hanım’ın Bakkal Bretamos’a olan borcunu ödemesi 500 guruşa sulh Ma‘rûz Bakkāl tâifesinden Bretamos v. Yağmur nâm zimmî İstanbul Bâb Mahkemesi’nde meclis-i şer‘-i hatîrde İstanbul’da Davudpaşa mahallesinde sâkine mu‘arrefetü’z-zât Atiye Hanım bt. Ali muvâcehesinde kasab tâifesinden Mustafa b. Mehmed nâm kimesne hâzır olduğu hâlde mezbûre Atiye Hanım zimmetinde târîh-i i‘lâmdan on altı ay mukaddem sadriye oğlu gāib ani’l-meclis Hasan Hüseyin’in velîmesi cemiyetinde hâzır-ı merkūm Mustafa yediyle mâlımdan ve yedimden iştirâ ve kabz eylediği ma‘lûmü’l-vezn ve’l-fiyat pirinç ve revgan-ı çerviş ve asel semenlerinden sekiz yüz doksan bir guruş ve ba‘dehu kendi yediyle iştirâ ve kabz eylediği kezâlik pirinç ve revgan-ı çerviş semenlerinden yüz dokuz guruş ki cem‘an bin guruş alacak hakkımın iki yüz elli guruşunu mukaddemâ hâzır-ı merkūm Mustafa yediyle bana irsâl ve teslîm etmekle bâkīsi olan yedi yüz elli guruşu mezbûre Atiye Hanım’dan hâlâ taleb ederim deyü tasaddî eylediğim da‘vâmdan bâ-tavassut-ı muslihûn merkūme Atiye Hanım ile bi’t-tav‘ ve’r-rızâ beş yüz yirmi guruş üzerine ba‘de-akdi’l-musâlahati ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr beş yüz yirmi guruşu müdde‘î-i mersûm Bretamos zimmîye edâ ve teslîme merkūme Atiye Hanım’a tenbîh olunduğu mübâşirleri Bâb-ı Seraskerî kavaslarından Yaylalı Mehmed Kavas kulları yediyle huzûr[-ı âlîlerine i‘lâm olundu] Fî 13 Şa‘bân sene [12]55