Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 126 Hüküm no: 133 Orijinal metin no: [15b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın kocasından muhalaa yoluyla boşandığı Muhâla‘a Ma‘rûz Kocaeli sancağına tâbi‘ Sarıçayır kazâsında Kasımçavuş mahallesi ahâlîsinden sâhibe-i arzuhâl mu‘arrefetü’z-zât Âişe bt. Ali nâm hatun İstanbul Bâb Mahkemesi’nde meclis-i şer‘de zevc-i muhâlı‘ı derûn-ı arzuhâlde mezkûrü’l-ism olup bâ-mektûb-ı sâmî Kumkale’den Der‘aliyye’ye ihzâr kılınan Süleyman Ağa b. Mehmed nâm kimesne muvâcehesinde mezbûr Süleyman Ağa zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i müeccel hakkım olan yüz elli guruşun ancak yüz guruşunu zevcim mezbûr bana edâya ta‘ahhüd etmekle bâkīsi olan elli guruş ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve meblağ-ı mezkûr yüz guruşdan mâ‘adâ ibtidâ-i zevciyyetden işbu târîhe gelince sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr[-ı âlîlerine i‘lâm olundu] Fî 2 Şa‘bân sene [12]55