Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 127 Hüküm no: 134 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Merkül’ün terekesinin varislerine taksimi davasına zaman aşımından dolayı bakılamadığı Eğin kazâsında [Ma‘rûz] Vilâyet-i Anadolu’da Eğin kazâsı kurâlarından İçika <> nâm karye re‘âyâsından olup Rumeli’de Yergöğü kasabasında mütemekkin iken işbu târîh-i i‘lâmdan altmış sene mukaddem hâlik olan Merkül v. Avanis v. Atam zimmînin verâseti karye-i mezbûrede mütemekkineler zevce-i metrûkesi Martuk bt. Atam Nasrâniye ile sulbiye kebîre kızları Velvet ve Serpohi Nasrâniyelere münhasıra ba‘dehu kable’l-kısme zevce-i mersûme Martuk Nasrâniye dahi hâlike olup verâseti sulbiye kebîre kızları mersûmetân Velvet ve Serpohi Nasrâniyelere münhasıra ba‘dehâ on dört sene mukaddem mersûme Serpohi Nasrâniye dahi hâlike olup verâseti karye-i mezkûrede mütemekkin zevci Tatos v. Marat zimmî ile sadrî kebîr oğlu diğer Merkül zimmî ve sadriye kebîre kızı Meryem Nasrâniyeye münhasıra ba‘dehâ mesfûre Velvet Nasrâniye dahi hâlike olup verâseti sadrî kebîr oğlu Manok zimmî ile sadriye kebîre [kızları] Dirohi ve Şarop Nasrâniyelere ba‘de’l-inhisâr verese-i mersûmûndan mersûm Manuk v. Kasper nâm zimmî İstanbul Bâb Mahkemesi’nde meclis-i şer‘-i hatîrde mersûmun li-ebeveyn hâletesi kızı mu‘arrefetü’ş-şahs mersûme Meryem bt. Tatos nâm [zimmî] Nasrâniye muvâcehesinde min-kıbeli’l-üm ceddimiz ve mûrisimiz hâlik-i evvel-i mersûm Merkül zimmînin hîn-i helâkinde karye-i mezbûrede vâki‘ menzilimizde mevcûde bi’l-cümle terekesi <> olup veresesine mevrûs <> olan mecmû‘u <> on iki bin beş yüz guruş kıymetli ve ceddemiz hâlike-i sâniye-i mesfûrenin kezâlik terekesinden olup kızları mersûmetâna mevrûs olan mecmû‘u altı bin guruş kıymetli bi’l-cümle melbûsât ve mefrûşât ve huliyyât ve evânî-i nühâsiye ve gayrı nühâsiyeyi hâlike-i sâlese-i mesfûre Serpohi Nasrâniye sağlığında fuzûlen ahz ve istihlâk eylediğinden mâ‘adâ hâlik-i evvel-i mersûmun ile’l-helâk mülkü olup ba‘de helâk kezâlik verese-i mezkûresine mevrûs olan karye-i mezbûre civârında vâki‘ ma‘lûmü’l-hudûd ve’l-müştemilât bir bâb menzil ve ...? nâm mahâlde kâin kürûmu mülk bir kıt‘a bağımdan zikr olunan menzili karye-i mezkûre re‘âyâsından Şişman Bedros zimmîye iki bin beş yüz guruşa ve bağ-ı mezkûru li-ebeveyn hâlimiz Avanis zimmînin kızı Akise Nasrâniyeye yedi yüz elli guruşa bey‘ edip semenleri olan cem‘an üç bin iki yüz elli guruşunu dahi mezbûre Serpohi Nasrâniye kezâlik sağlığında ahz ve umûruna sarfla istihlâk edip lâkin anam hâlike-i râbi‘a-i mesfûre Velvet Nasrâniye mesfûre Serpohi Nasrâniye ile kırk altı sene ve ba‘de’l-hâlik kızı mesfûre Meryem Nasrâniye ile on bir sene müddetde bir beldede mütemekkineler olup ebeveyni zevcân-ı hâlik-i evvel > ve sâniye-i mersûmânın tereke-i merkūmelerinden hisse-i ma‘lûmesini va‘ad etmekde iken etmeyip bilâ-özr sükût ve terk-i va‘ad etmişidi el-hâletü hâzihî mesfûre Serpohi Nasrâniyenin terekesine kızı mesfûre Meryem Nasrâniye vaz‘-ı yed etmekle hâlike-i mesfûre Serpohi Nasrâniyenin sağlığında zevcân-ı hâlik-i evvel ve sâniye-i mersûmân terekelerinden olarak ber-vech-i meşrûh melbûsât ve mefrûşât ve huliyyât ve evânî-i nühâsiye ve gayrı nühâsiye > kıymetlerinden ve mârru’z-zikr <> menzil ve bağ semenlerinden yirmi bir bin yedi yüz elli guruşun on bin sekiz yüz yetmiş beş guruşunu mesfûre Meryem Nasrâniye vâzı‘u’l-yed olduğu tereke-i hâlike-i mesfûreden bana edâya mesfûre Meryem Nasrâniyeye tenbîh olunmak matlûbumdur deyü inkâra mukārin tasaddî eylediği da‘vâsı elli yedi sene müddetde anası mersûmenin ve üç sene müddetde kendinin ber-vech-i meşrûh da‘vâ <> mümkün iken bilâ-özr sükût ve terk-i da‘vâ eylediklerini mukırr u mu‘terif iken on beş sene bilâ-özr terk olunan da‘vânın bilâ-emr istimâ‘ından hükkâm-ı kirâm hazerâtı memnû‘lar olduğu müdde‘î-i <> mersûm Manuk zimmîye tefhîm olunduğu mübâşirleri Bâb-ı Seraskerî kavaslarından Halebli Deli Mehmed Kavas kulları yediyle huzûr[-ı âlîlerine i‘lâm olundu] Fî 28 Receb sene [12]55.